RIP Sec. Jess

Nasubo ang tibuok nasud sa pagtaliwan sa usa sa labing maayo ug ligdong niining lider nga si Department of the Interior and Local Government (DILG) Secretary Hon Jesse Manalastas Robredo diin nahisugamak siya sa usa ka trahedya niadtong Agosto 18, 2012 sa usa ka plane crash sa Masbate.

Usa sa mga ahensiya sa gobyerno nga gibati kaayo og kaguol ug kahingawa mao ang Bureau of Fire Protection sanglit ubos man kami sa DILG. Ang BFP 7 nakighiusa sa nasud sa paghandom sa mitaliwan nga lider ug gani nakabutang among Bandila sa Nasud sa half mast isip pagtahod ug pagpakita sa among kasub-anan.

Dili pa lang dugay, niadtong Disyembre 6, 2011 si kanhi Robredo ang among Guest of Honor and Speaker sa 38th Fire Service Recognition Day. Sa ngalan sa kinatibuk-ang pwersa sa Bureau of Fire Protection Region 7 among mga pahasubo sa pamilya Robredo. Rest in Peace Secretary Jess.

Sa pikas bahin, niadtong Agosto 13, 2012 dunay gihimong mubong programa alang sa turnover of commands tungod sa lapad nga lahugay sa mga opisyales sa BFP Region 7.

Dili mominos 30 ka mga opisyales ang gilahugay lakip na ang labing kontrobersyal nga paghulip kang SR. SUPT. ADERSON A COMAR isip Cebu City Fire Marshal. Daghan ang nanggawas nga espekulasyon sa maong pagbalhin kay lagi dunay aslom nga relasyon si SR. SUPT. COMAR sa kasamtangang Regional Director sa BFP 7 nga si SR . SUPT. MA. LUISA C HADJULA. 

Gidudahan usab kining maoy tubag sa BFP 7 tungod sa hulga sa city government bawion ang luna nga gitarokan sa mga buhatan sa BFP diha sa Pahina San Nicolas kay pabutangan sa annex building sa Cebu City Medical Center sa siyudad.

Alang sa kasayoran sa tanan wala kini kamatuoran . Si Comar gibalhin sa National Capital Region (NCR) isip Assistant Regional Director for Operations nga maisip nga promosyon.

Ang ranggo ni Sir Comar over qualified na pagka City Fire Marshal kay regional level na ang ranggo niini samtang ang City Fire Marshal at least CHIEF INSPECTOR.

 Ang maong order nga pinirmahan sa mitaliwan nga DILG SECRETARY JESSE ROBREDO base sa rekomendasyon sa BFP National Headquarters. Ang kahanas ug expertise sa fire fighting ug rescue operations ni Sir Comar dako og ikatampo sa mga suliran didto sa NCR. Good luck sa inyong bag-ong posisyon mga sir ug mam.