Overpricing sa CHAMP
Kun tinuod ang text nga akong nadawat wala lang pahimusli sa mga suod ni Mayor Michael Rama ang medical program sa dakbayan kun dili posible nga duna pay mga opisyal nga nanapi niini.
Matud pa sa kasayuran nga akong nadawat pinaagi sa text nga gipaburot sab og maayo sa mga botika nga accredited sa City Hall alang sa City Hospitalization Assistance and Medicines Program kon CHAMP ang presyo sa tambal.
“Henaut unta nga usbon ang mga presyo sa botika sa CHAMP kay grabe ka mahal. Example, ang B1-6-12 tag 1.50 pesos sa uban nga botika, but sa CHAMP prisyo 15 pesos,” nagkanayon ang text.
Ang dakbayan dunay duha ka mga botika nga accredited isip supplier sa CHAMP kini mao ang Pro-Poor Pharmacy ug ang Botika ng Masa. Ang duha pulos anaa mahimutang kilid sa Cebu City Hospital diin sagad sa mga beneficiaries sa CHAMP anaa malandig sa nahisgutang tambalanan. Ubos sa lagda sa CHAMP ang kabus nga buot mopahimulos sa programa mangayo og resita sa doktor ug ang maong resita maoy dad-on didto sa duha ka botika. Didto sa botika butangan og presyo ang mga tambal diin basi niini mao ni ipakita ngadto sa mga tagdumala sa CHAMP aron maisyuhan og Letter of Authority.
Ubos gihapon sa lagda P5 mil ray limit nga hinabang mahatag sa tambal mao nga luoy intawon ang mga kabus kay ang ilang P5 mil gamay ra kaayo ang tambal nga mapalit.
Kaluoy sa kabus gipahimuslan na ang ilang kwarta sa mga opisyal sa City Hall mapugos pa gyud intawon pagpalit sa mas mahal nga presyo sa tambal.
* * *
Ang samang pundo sa CHAMP maoy gipahimuslan sa labing minus duha ka mga dagkong opisyal sa dakbayan. Ang secretary to the mayor nga si Belinda Navascues mihakot og kapin sa P145 mil gikan sa pundo sa CHAMP aron ibayad sa hospital bill sa iyang anak nga na-admit sa Chong Hua Hospital. Ang laing opisyal nga si Philip Zafra, chief of staff sa mayor, giingong mikuha sab og kapin sa P400 mil gikan gihapon sa maong pundo aron ibayad gihapon sa hospital bill sa iyang anak sa Chong Hua. Ang anak ni Zafra giingong nahulog sa katre samtang ang anak ni Navascues nga giingong empleyado sab sa City Hall giatake sa hubak.
Kwestiyonable ang ilang pagpahimulos sa pundo tungod kay gawas nga dili sila mga indigents labihan kadako sa kwarta nga ilang gipahimuslan samtang ang mga kabus nga maoy tinud-anay nga beneficiary niini kutob ra sa P25 mil ang ilang makuha lisud-lisuron pa gyud.
Pipila na ka adlaw sukad moulbo ang kontrobersiya apan lupig pay pating bungol ni Rama nga wala gyud mokihol aron susihon ang maong irrigularidad. Gani iya pang gidepensahan ang iyang chief of staff sa pagpahimulos sa pundo.
Ang konseho hinuon nangayo na og listahan sa mga tawo nga nakapahimulos sa CHAMP ug kun pila ang kwarta nga ilang nadawat. Hinaut wala nay laing mga opisyal sa City Hall nga nagpabaga sa ilang nawong pagpahimulos sa kwarta sa mga kabus.
- Latest
- Trending
