Leksiyon sa mga ginikanan sa mga tinun-an sa STC

Dili na lang gyud unta angay ipamugos sa mga ginikanan sa mga tinun-an sa St. Theresa’s College ang kaso batok sa tunghaan nga igo ra nagpatuman sa school policies and discipline.

Samot na nga gi-dismiss sa korte ang writ of habeas data nga gisang-at sa mga ginikanan batok sa STC, angayan hinuon nga tun-an sa mga ginikanan ang ilang kaugalingon ug ang ilang mga anak niining pulong “cyber responsibility” aron mahimo na silang magmainampingon sa ilang paggamit sa social media sama sa Facebook.

Gidawat sa korte ang argumento sa abogado sa STC nga wala kuhaa sa ilegal nga pamaagi ang mga hulagway sa mga bata nga nag-posing-posing diha sa Facebook nga mga hubo ug adunay nanigarilyo ug nag-inom.

Ang korte mituo sa argumento nga walay “privacy” diha sa social media, ug ang tawo nga mag-apil-apil niini nasayod nga ang iyang account mahimong malili sa uban, sa kadaghanan.

Wala naman seguroy kapaingnan ang mga ginikanan. Sa ilang mga aksiyon ngadto sa korte, sila na hinuoy na-leksiyon.

Bisan unsaon, dili malalis ang usa ka tunghaan kun mopatuman na kini sa ilang mga pamaagi pag-disiplina sa mga tinun-an. Kun kitang mga tinun-an dili maka-uyon, wala gyud kitay laing mahimo gawas sa pagbalhin sa atong bata ngadto sa tunghaan.

* * *

Ang pagbutang niining satellite barangay hall sa Banawa-Englis maisip nga usa ka “conseulo de bobo” sa mga residente sa duha ka sitio nga nagdamgo og bulag nga gobyerno alang sa ilang kaayuhan.

Hinuon, nagtuo ko nga sa presensiya niining satellite barangay hall, maatiman na ang ilang mga panginahanglanon nga dugay nang wala maatiman sa barangay Guadalupe.

Manghinaot lang hinuon ko nga dili bunga sa politika kining gihimo ni Mayor Mike Rama nga pagbutang og satellite barangay hall sa Banawa-Englis.

Angay gyud kining butangan og mga opisyal nga makaatiman sa panginahanglanon sa mga residente sa Banawa ug Englis.

Karon nga wala mosugot ang mga residente sa Guadalupe nga mahimulag ang Banawa ug Englis nga gibiya-biyaan sulod sa dugay nang katuigan, ipakita nila ang ilang balos – kinahanglan ilang atimanon ang duha ka sitio nga kaniadto pa nagpakiluoy nga maatiman ug matagad.