Edukasyon ug patigayon sulbad sa kalisod

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Ang paghatag og kasayon sa pag-angkon sa edukasyon ug ang pagkabig sa mga kapitalista sa pagpatukod sa ilang patigayon maoy labing maayong paagi alang sa pagsulbad sa suliran sa kakabus sa katawhan ug dili ang pagpasiugda og mga programa sa kagamhanan nga magtukmod na hinuon kanila nga mahimong tapulan.  

Kini maoy kasagaran nga gipadayag sa mga tawo nga nakasinati usab sa hilabihan nga kakabus tungod kay mao man kini ang iyang namat-an og kahayag nga kahimtang sa ilang ginikanan.

Dugang pa nila nga daghan usab unta nga mga kabus nga nagdako lang ang ilang tinguha sa pagpadayon sa pagtungha apan tungod sa kalisod sa pag-angkon og edukasyon tungod sa dakong galastohan maoy hinungdan nga bugtong niining nasunod ang kakabus sa iyang ginikanan.

Matud pa nila nga kun ang edukasyon maoy usa sa mga pamaagi sa paghaw-as sa atong kalisod mao unta ang angay nga pagahimoon sa atong kagamhanan ang paghatag og kasayon sa ilang pagtungha. Naglakip na niini ang paghatag og kasayon sa pag-angkon sa edukasyon sama pananglit sa paghatag og libre nga pagtungha sa labing kabus nga kabataan nga nagtinguha sa pagpadayon sa ilang pagtuon.

Gitataw nila ang paghatag og tukmang edukasyon maoy paagi sa pag-andam sa kagamhanan alang sa paghatag og mga trabahante nga mohaum sa trabaho nga iyang nakat-onan sa panahon sa iyang pagtungha.

Nunot sa paghatag og kasayon sa pag-angkon og tukmang edukasyon sa mga kabus nga kabataan maoy himoon sa atong kagamhanan ang pagdasig sa mga kapitalista sa pagbutang sa ilang patigayon dinhi sa nasud.

Ang katukoran sa dugang patigayon sa mga kapitalista dinhi sa nasud makahatag usab og dakong kahigayonan sa katawhan nga makasulod og trabaho nga magsilbi niining panginabuhian.