Kinsay isakbang ni Cuenco?

Ang Bando Osmeña Pundok Kauswagan nagtimbangtimbang karon kinsa sa mga sakop niini ang isakbang kang Kongresista Antonio Cuenco sa pagka-kongresista sa south district, karon nga giisip nga si Cuenco pa gihapon ang labing lig-ong kandidato pagka-kongresista dili na sa BOPK, kun dili sa Team Rama na.

Pero wala may laing option ang BOPK gawas nilang kanhi DOTC Usec. Totol Batuhan ug Konsehal Bebot Abellanosa.

Kinsa nilang Totol ug Bebot ang maayong i-atbang ni Cuenco?

Kun si Totol, medyo makatupongtupong kay aduna man kini kasinatian sa pagpanday og balaod tungod kay dugay man kining nagtrabaho sa Senado, unya nasakop pa gyud sa volunteer lawyer sa prosekusyon sa Corona impeachment.

Si Totol maayo pa gyud manulti, gawas nga maayo mosulat. Sa akong nahibaw-an, si Bebot miyembro kini sa labing kataw-anan nga komitiba sa Konseho sa siyudad – ang Silent Committee – kay wala gyud kini tingog-tingog sa mga sesyon.

Nahinumdom ko niining Bebot sa dihang kapitan pa sa barangay Duljo. Motunga lang kini sa Duljo kun dunay sitio nga mag-pista, pero bisan na lang sa pag-greet sa mga tawo maglisod. Hinuon, maayo mokanta uban sa iyang banda.

Pero didto sa Ubos Balay Balaoranan nagkinahanglan kita og tawo nga mo-debate, dili singer. Dili pud kita kinahanglan og hilomon sa Kongreso. 

Pananglit mo-demand og “grand debate” ang mga botante sa south district tali nilang Cuenco, Totol ug Bebot, mosukol kaha si Bebot?

Pananglit mosukol, seguro ko nga panitpanitan si Bebot kay wala man gyud ko makadungog nga mitindog kini sa Konseho aron makig-debate sa mga kauban niining mga konsehal. Hilomon man kaayo kini.

Samtang si Bebot nagsige og pa-bingo sa mga barangay sa south district, lahi usab ang pagpangandam ni Totol kay tua kini magyampungad sa mga women’s group, panglimpyo sa kabaybayonan ug naghatag og livelihood project. Niadtong away ni Manny Pacquiao ug ni Timothy Bradley, si Totol didto sa bukiran sa south district kay nagsaulog sa world environment day pinaagi sa pagpananom.

Pananglit og suwertehon si Bebot, magsige na lang kita og bingo?

Maayo segurong hunahunaon og kadaghan sa BOPK kinsa nilang Totol ug Bebot ang ilang isakbang kang Cuenco.

Si Cuenco relax ra kaayo karon, kay nagtuo man siya nga kun si Bebot lang, kaya kaayo niyang panitpanitan sa kampanya.