LTO angay'ng mag-inabtik

Angay tingali nga ayuhon pa gayud pagdumala ni LTO Chief Virginia Torres ang Land Transportation Office kay tan-aw nako daghan pa nga palpak sa serbisyo sa maong ahensya sa kagamhanan.

Una, daghan pa nga mga dapit sa Mindanao nga dili konektado sa network sa LTO. Resulta, kun iparenyu nimo dinhi sa Sugbo ang rehestro sa mga sakyanan nga didto nabayran sa Mindanao, dili makita sa network ang transaksyon.

Nasugamak ko niini. Ang napalit nako nga kotse narehestro sa Danao City apan kay ang tag-iya taga didto man sa Mindanao, giparenyu niya ang rehestro dihang nakabisita siya sa ila.

Didto narenyu ang rehestro sa Tubod (Lanao) LTO branch sa tuig 2011. Karon buot nako kini nga iparenyu, kay ang pagparenyu sa rehestro mahimo man bisan asa nga opisina sa LTO.

Pastilan, wala man makita ang bayad nga gihimo sa tuig 2010 ug 2011. Sa ato pa, kun mamugos ko nga iparenyu gayud, makabayad ko’g multa sa maong tuig. Ang polis nga gipalitan nako sa sakyanan, buotan man, miinsister gayud nga sa LTO sila nagbayad ug dili sa “fixer.” Sa laktud, hasol kaayo kay kontakon pa sa LTO dinhi ang ilang branch didto sa Tubod aron sutaon kun dili ba “fake” ang resibo.

Awhag nako ni Assistant Secretary Torres nga hatagan kini niya og pagtagad. Unya, kining kakuwang sa mga plate numbers nganong mahitabo man kini?

Unya ang kadagkoan sa Commission on Audit (COA) miingon nga daghang mga plate numbers nga nausik lang. Tan-awa ra gud kanang mga taksi, pananglit ang plate numbers (111 CEO) makita ninyo nga binuhat ra tawon sa kamot ang plate numbers kon improvised plates. Nganong ingon man niini?

Gihatagan nila og plate numbers nga walay plaka? Unya, ang mga nagparenyu gipabayad og para sa current year sticker, apan walay sticker nga ihatag? Nganong pabayron man unya patakan lang og “no sticker available” ang resibo. Husto ba gud ni?

Bisan og Deputized Agent ko sa LTO apan kwestyonon nako ang pipila ka palpak sa maong ahensya, ilabi na nga apektado ko sa isyu nga kakuwang sa ilang link sa mga LTO branches didto sa Mindanao.

Naa pa’y mga opisyal sa LTO nga kun mangayo ta’g tabang, maayo lang sa sulti ug mga pasalig pero wala gayo’y mahimo. Mao diay nga birahan mo sa ubang mga kumentarista sa radyo.

* * *

Nagkahinabi mi’g kadiyot kagahapon si Joel Lee, ang pangulo sa Movement for a Livable Cebu nga wala kaayo makagusto sa pagpamutang og flyover projects diha sa atong mga karsada.

Apan wala makatubag si Joel kun unsay sulbad sa kahuot sa mga sakyanan diha sa Gorordo Avenue eskena Sudlon tungod kay ang mga moagi sa Gorordo Avenue gikan sa JY Square, dili man makalahos dayon tungod sa mga sakyanan nga gikan sa Mormon Temple ug mo-disilya paingon sa Sudlon Street, Lahug.

Dayon, daghan usab nga mga sakyanan nga gikan sa Sudlon nga modisilya usab paingon sa JY Square. Tinuod, kinahanglan nga palapdan ang atong mga karsada apan gikinahanglan nato ang flyover uy. Aw, maayo kay dunay pasiugdahan nga dialogue uban sa mga urban planners unya sa Hunyo 29, apan tan-aw nako, one-side ra ni kay wala man tingali sila’y giimbitar nga morepresentar sa DPWH.