Makaalim nga pag-ampo

“Ug sultihan ko pa gayud kamo: kung duha kaninyo dinhi sa yuta magkauyon sa pagpangayo bisa’g unsang butanga, kini ihatag kaninyo sa akong amahan nga atoa sa langit. Kay kun may duha o tulo nga magkatigom sa akong ngalan, anaa ako uban kanila.” (Mat. 18:19-20)

Usa sa labing epektibo sa “Spiritual Healing” mao ang pag-ampo nga katilingbanon diin ang tanan naghiusa sa pagpangayo, pagdayeg ug pag-ampo sa Ginoo. Pinaagi niining pag-ampoa atong nabatyagan ang gugma ug presensiya ni Hesus. Anaa ang kagawasan sa pagpadayag sa atong tumong sa pag-ampo. Mabatonan nato ang kaisog ug kaligdong sa atong pagtuo. Ang gahom sa Ginoo labing mabati sa tagsatagsa nato ka kasingkasing ug pinaagi sa hiniusang pag-ampo maoy timailhan sa atong pagkaanak sa Diyos ug tungod niini ang langitnong amahan dili magmakuli sa paghatag sa kaayohan maisperituhanon man o pisikal nga balatian. Dasigon nato ang pamilya nga sa kanunay maghiusa sa pag-ampo labi na kung adunay nagmasakiton.