Leksiyon ni Koko

Mahimo ra untang mangiyugpos si Senador Koko Pimentel. Magpaundayon na lang sa bul-og sa labing gamhanang politikanhong makinarya sa nasud karon nga gipangulohan ni Bise Presidente Jojo Binay. Ug mosakay sa alyansa sa politikanhong mga higante nga segurong maoy labing inilog sa nasudnon ug lokal nga piniliay sa sunod tuig ug sa piniliay’ng presidensiyal sa 2016.

Mahimo ra untang sundon ni Pimentel si Satur Ocampo. Kinsa napugos pagbarog sa entablado nga gitungtongan ni Bongbong Marcos, ang anak sa diktador nga nipabilanggo niya ug nilugos sa nasudnong kagawasan ug demokrasya sud sa daghang katuigan. Aron lang makakabayo sa nagbuntaog sa makinarya sa politika nga gipundohan ug gipangulohan ni Manny Villar.

* * *

Apan gipili ni Pimentel ang pagtiyabaw. Batok sa labing agresibong pagpangronda sa mga puwersa sa politika nga gilusad nilang Binay ug kanhi presidente Joseph Estrada. Nga nakahagdaw sa mga politiko nga labing lunod patay nga mga loyalista ni kanhi presidente Gloria Arroyo. Apil na silang Gwen Garcia, Mitos Magsaysay ug Migs Zubiri.

Si Zubiri ang labing di madawat ni Pimentel. Kay sa kampanya sa pagpapili pag-usab sa Mayo sunod tuig seguro niyang tukion ang plataporma batok sa pagpanikas sa piniliay. Di siyang katuyhad og barog kun iyang kuyog sa entablado si Zubiri. Nga iyang gipasanginlang nakapahimus sa tikas sa piniliay sa 2007 ug nakakawat sa labing dakong bahin sa iyang termino.

* * *

Tingali gisakitan lang gyud si Pimentel sa iyang pagkabiktima sa maniobra sa eleksiyon sa Mindanao nga gipasangil nilang Arroyo ug kanhi Comelec chairman Benjamin Abalos. Tingali sinsero lang gyud sa iyang kampanya batok sa tikas sa piniliay.

Tingali mobukal lang gyud ang iyang dugo kun makakita ni Zubiri. Nga makapahinumdom sa lima ka tuig niyang pakigbisog paglingkod sa luna sa Senado nga makiangayon unta niyang nadaog unom ka tuig nang nilabay. Kanus-a si Zubiri ang nagpatuyang paggasto sa P1.25 bilyones niyang pork barrel gikan sa 2007 ngadto sa 2011.

* * *

O tingali nakat-on lang si Pimentel sa kasaysayan. Kay samtang nidaog si Marcos, napilde si Ocampo ug iyang kaubang si Liza Maza niadtong 2010. Gipadaplin nilang Ocampo ug Maza ang ilang mga prinsipyo bugti sa nagbaha nga kuwarta sa kampanya ni Villar. Nanghinaot nga ang ilang pakigduwa sa sumosunod sa diktador mosangpot sa paglingkod sa mga walhon sa Senado sa labing unang higayon.

Mas pait nga kamatuoran ang nakaplagan nilang Ocampo ug Maza sa pagtapos sa mas paspas nga iskutenyo (salamat sa PCOS machines) niadtong Mayo 2010: Wa katabang bisan gamay ang binilyon ka pesos ni Villar sa ilang kandidatura; hinunoa, si Villar ang nakapahimus sa matinud-anon nga politikanhong base sa mga walhon, nga sama sa naandan wa mahaylo sa pagpanuburno ni mahudlat sa pagpanghasi. 

* * *

Email: [email protected]