Ehersisyo samtang nagtrabaho

Daghan kaayo karon ang nagtrabaho nga kanunay way higayon pag-ehersisyo, kay lagi nangyawat sa overtime o kaha sa kataas sa oras sa ilang mga trabaho.

Sama sa guwardiya sige lag barug o kaha maglingkod permi. Mga saleslady nga mora’g manikin magbarug labi nag way customer. Sa opis sigi’g dukog atubang sa kompyuter o tibuok adlaw sige’g rekord o sulat. Ug uban pa nga susama ining trabahoa, inig-off nimo, stress o kapoy kaayo ang pamati sa lawas. Busa ingna ani pag-ehersisyo samtang ikaw nagtrabaho:

Kun ang trabaho mokalab-anan nga sige lang og barug – kinahanglan matag karon ug unya, imo kanang pulipulihon pagrelaks ang imong tuo o wala nga tiil, pinaagi sa pag-alsa o paglihoklihok sa lapalapa ug iisa o ikinto, dayon itunob nga inanay pinakurog, aron mapalihok ang imong mga kaugatan.

Kun permi ka nagbarug nga di maglihok, mohinay ang sirkulasyon sa dugo, maong barikoson ang batiis ug mang hubag managko ang mga ugat maong kapuyon ka nga usahay mosakit ibarug ug makraman pa.

Kun ang trabaho mo kalab-anan gasige pud og lingkod perming nagduko sa kompyuter o nagsulat o unsa pay gihimo – kinahanglan pud nga matag karon ug unya, inanay iliraw ug ikipat panagsa ang mga kalimutaw mo nga di maglihok ang ulo ug unya ilihok na pud ang tuo o wala ang ulo nga pinalingi, pinaduko ug pinahangad.

Unya imo na sad ituyhad-ibukhad ang dughan mo ug pina-isa-isa pud ang abaga. Samtang naglingkod, ilihoklihok ang mga tiil ug kalma i-ikid ang hawak ug mobarug panagsa, i-unat sab ang bukton ug kamot.