Lunop lagi gihapon

Daghang mga motorista mahadlok kun makakita nga adunay mga sakop sa LTO-Task Force Alpha (TFA) nga mag-operate diha sa mga karsada. Mao kana ang rason nga ang uban mosibat inigkakita sa checkpoint. Nakasabot ko nganong ang ubang motorista mahadlok. Una, ang mga sakop sa TFA mga manggiluy-on, apan dili usab mahadlok manakop.

Manggiluy-on kami kay pananglit tulo ang imong “violation” mahimong usa lang ang among i-cite ug pahibaw-on lang nga ikoreher ang laing mga kalapasan. Tungod kini kay dagko na kaayo ang multa karon.

Dihang giimbitar ko sa mga opisyal sa TFA kaniadtong 2008 nga miapil sa ilang grupo, nagduha-duha ko tungod kay samtang girespitohan ang TFA, apan mauwaw ko tungod sa nadungog nga daghang mga kurakot sa mga traffic enforcers.

Sa ngadto-ngadto, nakombinsir ko nga moapil sa grupo kay gihatagan ko nila og uniporme ug ID isip honorary member.

Managsama kami ni Kongresista Tomas Osmeña, Konsehal Augustus Pe Jr., Edwin Jagmoc ug daghan pa nga iladong tawo sa Sugbo, nga mga honorary members sa TFA. Apan sa tanang honorary members, ako ra ang mosalmot sa operation.

Akong tumong pag-apil sa grupo mao ang pagkampanya og kausaban. Sa mga upat ka tuig na nako nga nahimong road law enforcer isip usa sa mga deputized agents sa LTO, makadaghan na nga gitanyagan ko nga subornohan sa madakpang drayber.

Gipasabot nako kadtong gusto nga mosuborno nga usbon nila ang ilang batasan kay kun magsigi sila og panuborno, mosamot nga bati ang imahe sa mga traffic enforcers.

Sa akong bahin, kadtong akong mga madakpan makasabot gayud sa ilang kasaypanan kay ako man sila nga pasabton. Kadtong isyu nga naglambigit sa anak ni City Treasurer Ofelia Oliva, dili gayud maayo.

Angay gayud unta nga si Karen Olvido mohatag sa iyang lisensya nga gipangayo sa road law enforcer kay mao kana ang gilatid sa Section 19 sa Republic Act 4136, ang Transportation and Traffic Code.

* * *

Hain na man ang dredging sa atong kasapaan? Kaniadtong Lunes sa hapon mibunok ang kusug nga uwan, kadiyot ra gani, apan naglunop dayon ang Manalili Street ug D. Jakosalem.

Tawgon nako ang atensyon sa mga city engineers nga pasabton nila ang publiko ngano nga naglunop man gihapon nga duna na man kaha’y dredging nga gipahigayon?

Husto lagi ang akong gisulti kaniadto nga ang dredging kon pagpalawom sa atong kasapaan kun dili usab paladman ang entrada didto sa dagat, wala gihapo’y kapuslanan kay mobalik man ang tubig-baha dinhi sa downtown.

Apan yuna pa, mora’g wala pa makakita ang katawhan nga adunay dredging nga gipahigayon sa gitawag og Estero Parian, kanang sapa nga anaa mag-agi ilawom sa mga department stores sa dalan Colon. Ang gikuyawan nako og moreport na unya ang contractor didto sa Department of Engineering and Public Works (DEPW) nga nahuman na ang ilang gikontrata nga proyekto.

Palihug City Engineer Kenneth Enriquez mandoi ang imong mga sakop nga ipa-monitor pag-ayo ang implementasyon sa proyekto. Basin baya og mausik lang ang atong kwarta nga gi-budget niini.

Nakabantay baya ko nga nag-ilogay ang mga kontraktor sa pag-angkon og proyekto mao nga gibahin-bahin ra nila kinsa ang makakuha sa kontrata. Ayoha ninyo nga masulbad ang problema sa lunop-baha.