Ang PDEA gihagit

Dunay usa ka lumulopyo sa dakbayan sa Talisay nga mihagit sa kadagkoan sa Philippine Drug Enforcement Agency (PDEA) nga mohimo sila’g kampanya sa giingong ilado nga druglord nga naglihok dinhi sa Sugbo.

Ang suwat nga gipadala sa PDEA-7 pinitsahan og Mayo 21, 2012, gi-address kini ngado ni Adrian Alvariño. Tingali ang sender sa suwat, nga dili lang nato ipaila ang ngalan, wala masayud nga bag-o na ang direktor sa PDEA-7. Si Jigger Montallana mao nay regional direktor sa PDEA-7. Busa si Montallana na maoy angay’ng mohatag og pagtagad sa maong suwat sa taga Talisay.

Ang mireklamo, mibutang gayud sa iyang ngalan sa suwat, apan ako maoy mihukom nga dili lang usa kini ibutyag apil ang ngalan sa tawo nga gipasanginlan niya nga druglord.

Matud sa mireklamo nga gusto niya nga puhagon ang drugas kay pipila sa iyang pamilya nabiktima niini. Gitawag niya ang atensyon sa kadagkoan sa PDEA-7 nga aksyonan ang giingon niyang druglord nga nagdala sa inisyal nga “FS.” Kini kuno si “FS” adunay daghang drug pushers sa dakbayan sa Talisay, Minglanilla, Pasil ug Ermita ug ubang dapit sa probinsya. Gihulagway kini nga “untouchable” kay dunay daghang mga polis nga higala, apil na gani ang mga opisyal.

Wala hinoon hinganli sa suwat ang mga opisyal sa kapolisan nga mga higala ni “FS” apan dunay usa ka polis sa Talisay nga nagranggo og PO2 nga protektor sa maong druglord.

Ang higala nako sa PDEA mitug-an nga gikuyawan sila kay kini si FS duna gihapoy mga amigo diha sa ilang ahensya. Naglaum ang sender sa suwat nga si Direktor Montallana dili masayop sa paghatag og kamandoan kinsa ang iyang tahasan.

* * *

Angay bitaw gayud nga hatagan og dakung pagtagad ang paghimo nga moderno sa atong mga public elementary ug high schools nga nahimutang sa mga bukirang barangay sa lainlaing dapit sa nasud. Gisuportahan nako ang sugyot sa mayor sa Valenzuela City nga si Sherwin “Win” Gatchalian atul sa iyang pagbisita dinhi sa dakbayan sa Sugbo pipila ka adlaw ang milabay.

Wala masayop si Gatchalian sa iyang obserbasyon nga daghang public schools sa kabukirang barangay sa nasud nga gipasagdan lang. Sa laktud nga pagkasulti “pait pa’s panyawan” ang kahimtang sa maong mga tunghaan.

Apan unsaon nato pag-upgrade sa atong mga tunghaan nga maapike man kini sa kwarta kay mosamot man hinoon kadaku sa gasto sa Department of Education kay dugay na man kaayo nga makagradwar ang mga tinun-an tungod sa pagpatuman og K+12.

Sa interview sa media ni Gatchalian, iyang gibutyag nga sa iyang pagsuroy-suroy sa lainlaing bahin sa nasud nabantayan niya nga daghan sa mga tunghaan sa mountain barangays walay “IT-related equipment” sama sa computers.

Mao kana ang rason nga ang mga tinun-an nga mogradwar sa high school diha sa bukid mas maayo pa ang kinder diri sa kinapusoran sa dakbayan kay bansay pa mogamit sa computers ilabi na ang internet nga gitumong aron pag-andam kanila kun motungha na sila sa koliheyo.

Nindot kaayo kining maong sugyot ni Gatchalian. Tan-aw nako, mas maayo unta kun si Gatchalian pa ang gihimong DepEd Secretary. Kun dili, awhagon nako siya nga modagan pagka senador kay maayo man siya og panglantaw sa atong nasud.