Fire exit drills

Usa ka dakong sunog ang nahitabo sa Butuan City niadtong Mayo 9, 2012 diin 17 ang nakalas sa maong sunog gumikan kini sa pagka trap sa sulod sa usa ka commercial establishment.

Makalilisang kaayo ang maong trahedya sanglit ubay ubay man ang napaig nga kinabuhi ug dako ang danyos sa kabtangan ang natala niini. Dili gyud diay nato matag-an og kanus-a moulbo ang usa ka dakong sunog maong sa kanunay unta magmatngon ug mag-amping kita aron malikayan nato kini.

Ang sunog dili sama sa mga natural calamities sama sa bagyo, linog ug uban pa nga dili gyud nato pwedeng mapugngan. Pwede kaayo natong mapugngan ang sunog nga dili mahitabo.Maong dunay mga fire prevention measures ang atong kabomberohan aron malikayan nato ang sunog.

Usahay ang pagkompiyansa ug pagdanghag maoy numero uno nga hinungdan sa sunog. Subay sa akong nahisgutang dakong sunog sa Butuan City, mikompirmar ang City Fire Marshal sa maong dakbayan nga ang maong commerical establishment napakyas sa pagkuha og Fire Safety Inspection Certificate kon FSIC.

Gumikan sa kulang niini nga requirement nga mao ang pagpahigayon sa fire drill sa maong tindahan. Ang nakaparat pa gyud kay mibuhi og estorya ang abogado sa maong establisamento nga dili pud daw masiguro nga maminosan ang nakalas kun nakapahigayon pa og fire exit drill.

Murag dili pud ko mouyon sa maong statement. Dili angayang himuong excuse o palusot ang kapakyas niini pagpahigayon og fire exit drill ug dayong ingon nga di pud nila masigurong gamay ra ang mamatay bisan duna pa niini.

Akong personal nga opinyon , posibleng naminosan gyud ang nakalas o basin pa gani og walay nakalas sa maong sunog kun nakapahigayon lang unta sila og fire drill.

Unsa may atong makuhang leksyon niini? Una, kinahanglang mosunod sa mga rekomendasyon sa BFP. Ikaduha, ang pagpahigayon sa mga drills. Ug sa kataposan, pahimusli ninyo ang mga lectures ug seminars sa fire safety sa atong kabomberohan.

 Ayaw kamo pagpanuko sa pagbisita sa mga fire stations sa inyong lugar ug kun buot ninyo nga magpahigayon og mga fire exit drills ug uban pang mga activities kabahin sa fire safety pahibaw-a lang ang mga sakop sa maong fire station aron ma-schedule kini.