Jun-Jun Osmeña nagsugodsugod na

Makalibog sa mga residente sa south district kinsa sa mga interesado mag-kongresista sa maong distrito ang hatagan og bendisyon ni Kongresista Tomas Osmeña.

Samtang naglumpayat si Konsehal Bebot Abellanosa tungod sa pagtuo nga siya’y dihogan ni Tomas sa lana sa politika alang sa south district, nagkaklaro ang ubang mga ngalan nga maoy mas duol sa luwag.

Nagsugod na og tuyok sa kabarangayan ang pag-umangkon ni Tomas nga si Jun-Jun Osmeña, ang igsuon ni Konsehal Ritchie Osmeña. Kini tungod usab sa iyang dakong hagit pagserbisyo sa south district pinaagi sa pagka-kongresista.

Ang barangay Labangon nga usa ka vote-rich nga lugar mao karoy gipangunayan og lingkod ni Jun-Jun Osmeña pinaagi sa proyektong “Wish for A House” nga giabagan sa Rotary Club of Banilad Metro, pinanguluhan ni Ian Osmeña.

Talagsaon kining proyektoha nga gisuportahan ni Jun-Jun Osmeña tungod kay ang benepisyaryo niini mao ang usa ka pamilya nga adunay 11 ka mga anak.

Mismo ang Rotary Club of Banilad Metro ug barangay Labangon, pinaagi ni Kapitan Victor Buendia, mihangyo kang Jun-Jun Osmeña sa pagsuporta niining proyektoha. Si Jun-Jun usa ka manager sa Pagcor.

Ingon ra seguro niini kining proyektoha, pero sugod-sugod kini ni Jun-Jun aron mailhan sa mga botante sa south district.

Dili kakompiyansahan si Jun-Jun Osmeña kun siya’y bendisyonan sa iyang uyoan nga si Tomas, ilabi na nga nagdala siya sa apelyido nga Osmeña unya usa pa gyud ka batan-on ug walay dautan nga rekord ang ngalan.

Kun mao kini ang sitwasyon sa Mayo sunod tuig nga eleksiyon, alegre ang eleksiyon sa south district kay ang magkontra mao silang Jun-Jun Osmeña, kanhi DOTC Undersecretary Totol Batuhan, Bebot Abellanosa ug kanhi Kongresista Tony Cuenco.

Bisan ra ba tua si Cuenco sa Indonesia tungod sa iyang pagka-secretary general sa AIPA (ASEAN Inter-Parliament Association), padayon kini sa iyang konsultasyon sa mga lider sa barangay ug mga karaang lider sa mga barangay ug sitio.

Alegre kaayo!