Ang rocket sa Nokor

Sa tunga-tungang bahin ning adlawa ug sa petsa 16 ning buwana paluparon gayod sa Nokor o North Korea ang ilang rocket didto sa kawanangan aron magsilbing obserbatory satellite sa nahisgutang nasud alang sa pagpalambo sa ilang ekonomiya, natural resources ug weather stations. Apan nagduda ang Amerika ug kaalyado niining mga kanasuran sa tumong sa North Korea busa giprotistahan niini ang pagpalupad sa rocket. Gipahinumdoman sa Amerika ug mga kaalyadong nasud ang North Korea nga usa ka dakong kalapasan sa patakaran ug balaud sa United Nations ang pagahimoon niini. Gipinahan ug gipasidan-an usab sa Amerika ang North Korea nga usa ka provocative act o pag una-una ang pagpalupad sa nahisgutang nasud sa ilang rocket ngadto sa kawanangan. Aron mahanaw ang mga pagduda sa ubang kanasuran, giimbitahan sa Nokor ang mga sakop sa media aron ipakita ang ilang rocket nga paluparon apan wala gihapon makontento ang Amerika.

Nganong masuko man ang Amerika ug kaalyado niining mga nasud kun dili motuman o mosunod ang North Korea o Nokor sa mga patakaran ug balaud sa United Nations nga sila mismo wala man usab mosunod niini. Nakalimot ba diay ang Amerika ug ang mga kaalyado niining kanasuran sa ka dako sa ilang gihimo dihang wala nila sunda ang hukom sa United Nations Security Council nga nagdili sa ikaduhang pag ataki sa nasud sa Iraq tungod sa giingong weapons of mass destruction? Nakalimot ba diay ang Amerika nga mas daghan ang mga rocket nga iyang gipalupad didto sa kawanangan kay sa North Korea? O ba kaha gusto lang gayod siya nga magpahawod-hawod.

Ang Amerika ug mga kaalyado niining kanasuran walay moral ascendancy nga manaway sa wala pagsunod sa North Korea sa mga patakaran ug balaud sa United Nations tungod kay siya mismo ang pinakamasinupakon sa tanang kanasuran sa kalibutan. Nagsalig man ugod ning Amerika tungod kay ang United Nations maayo lang mopahamtang og silot niadtong mga gagmay nga mga nasud nga makahimo og kalapasan sa ilang mga balaud ug patakaran pero pangag o walay ngipon kun ang Amerika na ug ang Britanya na ang magpabadlong.

Hinoon dili ta makabasol sa Amerika kun mao kini ang iyang bation sa pagahimoon sa Nokor tungod kay usa man ugod kini ka nasud nga komunista. Kontra man ugod sa Amerika ang mga nasud nga komunista.