EDITORYAL - Ang juvenile law way tarong nga nakauyon

Kining balaod nga nagdili pagsilot sa makasala nga menor de edad labing nagtukmod sa mga bata ngadto sa hiwi nga kaugmaon.

Ang komon kaayong krimen nga mahimo sa mga menor de edad mao ang pangawat.

Sa bisyo nga pangawat, impluwensya ra maoy dali kaayong makapakat-on sa bata niini. Buot ipasabot nga dali kaayo silang masina sa isig-kabata nila nga makasapi sa kinawat, busa mangawat usab sila.

Kumo kay protektado  man sila sa balaod, wa silay pagkalugda, tungod kay way otoridad nga makahimo sa pagdakop kanila aron ibalhug sa prisohan kun masakpan sila nga mangawat.

Kun sayo sila ma drug addict sama sa mga rugby boys, di lamang sila mosangko sa pagka-kawatan kundi mahimo nang hardened criminal nga mahimo nang mopatay sa ilang isig-katawo, mang-hold-up, mang-snatched ug uban pang krimen nga sagad mahimo lamang sa hamtong nga tawo.

Gumikan niining juvenile law nga nanalipod sa ilang pagkadautan, gipalig-on ning balaora ang pagkadautan sa bata.

Bisan maoy pagtuo sa mga magbabalaod nga pasagdahan lang una ang mga batang makasasala sa pagbuhat og sala sa pagtuo nga inigkadagko nila mareporma na sila, apan sayop kaayong pagtuoha.

Kay sa growing period sa bata kun   imo siyang gi-master o gianad sa pagbuhat og sala, lisud na niya kanang biyaan inigdako niya kay naanad na siya.

Maayo tingale kun sa matag pakasala niya sama sa pagpangawat may silot nga ipahamtang kaniya aron matilawan niya nga sakit diay ang silot busa di siya angay mangawat.

Apan ning balaod karon, gipangga ang mga batang daotan nga murag indirektamenteng gihatagan sila og higayon nga labing mahimong dautan ugma damlag.

Sa Biblia gitudlo sa Dios nga kun ang imong minahal nga anak makasala, bunali , kay diha sa pagbunal, imong gitudloan ang imong anak nga matanos ang hiwi niyang kinaiya .

Apan kun di nimo mahal ang imong anak, duyana siya kun makasala kay basin ugma damlag ikaw na ang ihawon niana. Di ba?