EDITORYAL - Ang trak sa bombero panahon sa sunog

Kasagarang mulo sa mga masunogan mao kuno ang kalangay muabot sa mga bombero sa panahon sa sunog. Unya daghan kaayo ang mga katarungan nga mabati gikan sa mga bombero ug pipila niini mao ang distansya sa nasunogan ug sa fire station, ikaduha mao ang traffic, ang kawalay tubig sa ilang trak, o kaha ang pagkagubaon sa ilang firetruck, ug  uban pa.

Gumikan sa maong mga hinungdan, makabuylo na pag-ayo ang kayo ug daghan na kaayo ang mga estraktura nga masunog una muabot ang mga bombero, ug usahay ugdaw na ang tanan una muabot ang kabomberohan.

Apan di usab nato dayon ihan-ok   ang tanang lapso ngadto sa kabomberohan, tungod kay ang kalangay sa pagpahibawo sa mga kabomberohan bahin sa sunog, usa baya usahay ang hinungdan sa kalangay pag-abot sa mga bombero.

Angay usab masayran nga bisan sa 5 minutos lang nga kalangay sa pagresponde sa kabomberohan ngadto sa dapit nga nasunogan dili na tiaw ang kadako sa maabtan sa kayo sa maong gidugayon.

Ang una ra bang makapanawag og bombero sa panahon sa sunog mao kadtong mga silingan nga    may linya sa telepono.

Kun may cell phone apan way telephone number sa bombero, di gihapon makatabang sa pagtawag og bombero, busa labing maayo nga matag balay may kopya gyud sa numero sa bombero nga sinuwat sa dagkong litra ug ipapilit sa bungbong nga dali rang makita sa tanan.

Sa bahin sa kabomberohan, sama ra sila sa Comelec nga kun way election wa usab sila’y trabahuon kaayo.

Busa sa mga oras nga way sunog, mao nay panahon nga ipaayo ang gubaon nga firetruck, pag-andam sa tanang ekipo, tubig, hose, hagdan ug uban pa. Di kay unya na magkisi-kisi sa pagpangandam kun aduna nay sunog, mao nga inig-abot sa dapit nga nasunogan, ugdaw na ang tanan. Di ba?