SRP (Sige Ra Pamangag) road

Unsa man gyuy nindot nga karsada? Sementado o aspaltado?

Diha sa South Road Properties, mailhan ang kalainan.

Sa aspaltado nga karsada, hilabihang kadaghan sa libaong ug lubak-lubak nga tinapakan.

Sa aspaltadong karsada, walay puas ang tinapakay sa mga sakop sa DPWH.

Sa aspaltadong karsada, kuyaw mosaliring ang mga mag-motor kun ma-shot sa bangag bisan ang pangunahan nga ligid.

Sa aspaltadong karsada, dali mabuak ang mga shack sa sakyanan, mahilis ang ligid ug mangaluag ang mga tornelyo. 

Sa sementadong karsada, hamis pa kaayo. Duna man ugaling bangag pero puwerte ra gagmaya.

Apan nganong ganahan man kaayo og aspalto ang gobyerno, ilabi na ang DPWH?

Sa usa ka libro nga gi-publish sa PCIJ, kini nagkanayon nga “adunay kuwarta sa karsada.” Ang gipasabot niya nga sa karsada, mahimong mosapi og minilyon nga kickback ang mga politiko, partikular na ang mga magbabalaod nga maoy mo-allocate og pundo alang sa mga proyekto.

Kun magsige og kalungag ang mga aspaltadong karsada, siyempre magsige og lusot ang pundo sa gobyerno aron gamiton pagtapak sa mga libaong. Ang pangutana aduna bay nag-monitor kanila aron maklaro pilay nagasto pagtapak sa mga bangagbangag?

Ang Cebu South Coastal Road, ilabi na diha sa SRP, grabe na kaayo kalibaongon sa karsada. Pero ang tinapakan puwerte gyud batia. Aduna man tinuod gitapak, apan dili na parehas sa sementadong karsada nga hamis ug nindot daganan sa sakyanan, dili makaguba og shack.

Naglibog gani ko, sa Cebu South Coast Road habig na sa Talisay, unahan gamay sa Laray paingon sa Cansojong duol sa kan-anan og kalderetang kanding, ang sementadong karsada gitabonan og aspalto.

Kinsa may nagbuot niana?

Tan-awon nato, pila ka bulan sukad karon, magkaproblema na pud kitang mga motorist nga pirme mag-agian sa SRP kay kanang lugara mapuno na usab sa libaong.

Kaniadto walay libaong ug hamis kaayo ang sementadong karsada, nangita gyud og problema pinaagi sa pagtabon og aspalto.

Sa ako nang gikaingon, dunay kuwarta sa karsada – kuwarta nga ang mga politiko ug mga opisyal sa DPWH ra ang mabulahan.

* * *

Nagkaklaro na ang line-up ni Mayor Mike Rama niining pag-abin karon ni kanhi Kongresista Tony Cuenco sa iyang grupo, unya hayag na usab nga anha mokuyog niya si Konsehal Edgardo Labella ug si Konsehal Joey Daluz.

Nagtuo ko nga gawas nilang Cuenco, Labella ug Daluz, daghan pa nga mga personalidad sa siyudad ang mokuyog sa kawsa ni Mike Rama.

Sa laing bahin, si Kongresista Tomas Osmeña wala mahadlok sa pag-abin nilang Cuenco. Ambot kaha niining pagkuyog karon ni Labella sa grupo ni Mike.

Gibalik ni Tomas ang sitwasyon kaniadtong una niyang dagan sa pagka-mayor sa siyudad batok kang Boy Cuenco nga igsuon ni Tony Cuenco, nga wala gani siyay suporta sa mga kapitan pero siyay midaog tungod kay matud niya ang mga tawo didto modapig kaniya.

Dili ba kaha ma-usab ang sitwasyon karon nga nahibalo na usab ang mga Sugboanon sa klase sa politika ni Tomas ug ni Mike?

Dili ba usab kaha mangita og kabag-ohan ang mga tawo.

Ang eleksiyon sa 2013 maoy mosukod sa pulso sa mga Sugboanon – mosukod kun anaa pa ba sa ilang dughan ang BOPK nga ilang gilabanan sulod sa dugay’ng katuigan o kinahanglan na nga magbag-o og liderato ubos sa bag-ong grupo nilang Mike, Cuenco, Labella, Daluz ug uban pa.

Kining pagtuboy sa mga opisyal sa barangay sa grupo ni Mike niini ka-sayo dako og ginta, apan unsaon man nato nga hangtod karon ang gipanghambog ni Tomas nga bagang suporta sa mga Sugboanon sa BOPK nagpabilin pa man?

Mao kini akong giingon nga sukdanan niini mao ang 2013 nga eleksiyon. Atong paabuton.