Paghipos sa mga bugok

Sa katapusan nadakpan na gayud ang giingong suspetsado sa mga drive-by shootings dinhi sa dakbayan sa Sugbo. Si Rene Baclaan, ang giingong hitman sa Bloods Gang, nadakpan sa iyang hideout sa dakbayan human sa pipila ka semanang operasyon sa kapolisan.

Si Baclaan ang giingong suspetsado sa mga drive-by shooting didto sa mga barangay sa Kinasang-an, Guadalupe ug Bulacao pipila ka bulan na ang nakalabay. Human sa maong pagpamusil, gikatahong mikalagiw kini ngadto sa dakbayan sa Talisay ug Minglanilla.

Karon nga nasikop na kining maong suspetsado, mahatagan na gayud og hustisya ang mga biktima. Hinuon wala ko moingon nga si Baclaan gayud ang nagpaluyo sa maong mga insidente.

Napasaka na sa Cebu City Prosecutor’s Office ang kasong ilegal nga paghupot og armas batok kang Baclaan ngadto sa korte ug ato lamang hulaton ang dagan sa husay niini. Ug hinaut nga dalion kini paghusay aron usab dali rang maangkon sa mga pamilya sa mga biktima ang hustisya.

Grabe nga alarma ang publiko niadtong mga drive-by shootings. Daghan ang nagdumili pagsuroy sa kadalanan tungod sa kahadlok nga mataymingan sila sa dautang hangin.

Gani hasta si Mayor Michael Rama ang gibati og kayugot niadtong mga pagpamusil. Kini gumikan kay wala pay nadakpang suspetsado ang Cebu City Police Office.

Apan sa dihang mimando na ang mayor paggukod sa mga mamumuno, abtik pa sa manatad ang kapolisan. Human sa pipila ka adlaw nga pag-ukoy kang Baclaan, nabitik gayud kini sa otoridad.

Dili lamang kini ang mga insidente sa drive-by shooting nga nahitabo sa dakbayan. Kahinumdoman nga mikalas usab og mga kinabuhi ang susamang insidente pipila ka tuig na ang nakalabay.

Niadtong maong pagpamusil, napagan pa ang among opisina tungod kay daghan sa mga nagtindog ang gipamusil sa mga nagsakay og motorsiklo. Maayo na lamang kay walay naigo. Apan maayong pagkatusik sa mga bala ang sementong dingding sa among building.         

Hinuon nadakpan ang usa sa mga suspetsado nga giingong notoryos usab nga personalidad dinhi sa dakbayan. Gani miyembro kini sa usa ka notoryos nga fraternity nga kanunay usab ma-involve sa mga rambol uban sa ribal nga fraternity.

Hinuon atong daygon usab ang kapolisan sa pagkasikop sa giingong triggerman sa nakalabay’ng drive-by shootings. Kini nga kalamboan klaro nga nakapahuwas sa kalisang sa katawhan.

Aron mapugngan ang susamang insidente, angay lamang nga pakusgan sa kadagkoan sa CCPO ang police visibility. Kini aron sa ingon bation og kahadlok kadtong mga kriminal pagpadayon sa ilang binugok nga binuhatan.

Bitaw. Lisod kun maunhan kita niining mga badlongon sa katilingban. Mas maayong silay maunhan sa otoridad ug mahipos sila sa dili pa sila makapuwerhisyo sa katilingban.     

Hinuon adunay pipila ka polis ang sige’ng nag-posting sa kadalanan sa dakbayan, ilabina sa downtown area. Ug nagpasabot kini nga gitinuod na sa otoridad ang kampanya niining mga bugok sa katilingban.

* * *

Email: [email protected]