Alkanse g'yud ta

Angay g’yud nga ayuhon sa pagsuperbisar sa mga opisyal sa Department of Engineering and Public Works (DEPW) ang pag-implementar sa pagpalawom sa atong kasapaan aron dili mausik ang kwarta sa katawhan. Bisan ako makaingon nga anugon lang ang P6.9 milyones nga gigasto sa dakbayan sa pagpalawom sa sapa nga milagbas sa barangay T. Padilla paingon na sa barangay Tejero kay baha man gihapon.

Sa kontrata gilatid nga adunay mga heavy equipment nga gamiton sa pagpalawom sa kasapaan apan wala kaayo kini makit-i atul sa ilang pagpatuman sa proyekto.

Gani ako ug ang pipila ka konsehal, sama ni Konsehal Alvin Arcilla ug Michael Ralota, nakakita nga ang mga tawo nga gisuholan sa paglimpyo sa kasapaan diha sa T. Padilla ug Tejero, migamit ra man og gidugtong nga mga baril.

Kini maoy ilang kargahan sa mga lapok ug sagbot nga makuha gikan sa sapa aron dad-on sa daplin. Tan-aw nako wala g’yud nila mapalawmi ang bahin sa kasapaan nga buot unta nga palimpyohan sa dakbayan. Bisan og si City Engineer Kenneth Enriquez miingon nga nagdistino siya og engineer nga mosuperbisar sa proyekto, tan-aw nako wala kaayo kini mamaayo sa pagsuperbisar.

Awhag nako sa DEPW nga ayoha tawon sa pagsuperbisar ang pagpatuman sa mga proyekto kay aron dili mausik ang atong kwarta nga gibayad sa katawhan gikan sa ilang buhis.

* * *

Sa among interview sa mga ginominar nga hatagan og awards sa dakbayan sa Sugbo atul sa Charter Day karong Febrero 24, daghang mga inpormasyon nga amo nga nahibaw-an.

Ang uban hinoon niini dili pa nako ikabutyag kay milingkod man gud ko isip sakop sa Nine-Men members sa Cebu City Selection Committee nga mi-interview sa mga nominees.

Mahimong human sa among interview, unya na lang nako ibutyag.

* * *

Salamat diay ni Mayor Michael Rama ug City Administrator Jose Marie Poblete nga gihatagan ko nila og higayon nga mahimong sakop sa Selection Committee nga nagrepresentar sa media, ilabi na sa The Freeman ug DYLA.

Nakasabot hinoon ko nganong ako ang gipili nga mahimong sakop sa committee kay ako man ang presidente sa City Hall Association of Reporters in Media (CHARM).

Ang siyam ka sakop sa committee gikan kini sa lainlaing sektor sama sa media, business, non-government organization, Cebu City Council, Association of Barangay Council, Office of the Mayor ug uban pa.

* * *

Daghan gihapon ang wala mahadlok sa anti-jaywalking ordinance kay tiaw mo miabot og 68,000 ka tawo ang nadakpan sa pagpataka og labang sa karsada, ilabi na diha sa downtown area, sa miaging tuig. Nagpasabot kini nga sa usa ka adlaw labing minus 168 ka tawo ang madakpan. Apan bisan pa niini dili gihapon pabor si CITOM executive officer Rafael Christopher Yap nga pausbawan ang kantidad sa multa sa mga madakpan.

Bisan ako, supak ko nga pasakaan sa multa apan ang gusto nako mao nga bisan og gamay ra ang multa apan kanunay, mangahadlok g’yud sila. Dili ba? Ang uban gud diha wala man masayud nga duna diay ordinansa nga nagdili niini.

Unsaon nga sa ubang karsada kun molabang ka nga “go” pa ang signal dili ka man dakpon. Mao nga inig-abot nila sa downtown madakpan intawon, ilabi na kadtong taga probinsya.