Lamoklamok sa ring

Ang riot kon lamoklamok nga nahitabo didto sa Argentina human sa kadaugan sa atong best bet nga si Junriel Casimero nakapahinumdom kanako sa susamang boxing riot usab didto sa Zamboanga del Sur nga napu ka tuig na nga milabay.

* * *

Samtang way bisan usa sa mga boxing official nga nakapahunong sa lamoklamok didto sa Buenos Aires, diin naangol si Casimero ug iyang promoter nga si Sammy Gello-ani, ang riot didto sa Zamboanga napahunong sa usa ka tawo lamang.

* * *

Ang maong tawo mao si Leonardo “Daido” Angel, opisyal sa GAB adtong tungura didto sa Mindanao. Giunsa ni Daido pagpahunong sa lamoklamok diin mga tigas nga lalaki ang nagpasiugda?

* * *

Suma pa sa atong tinubdan, dihang nagkabayolenti na ang mga rioter kalit nga gipatukar sa public address system ni Daido ang Philippine National Anthem.

* * *

Kalit sab nga nahunong ang riot ug wa na mahibalik pa ang kasamok hangtud nahuman sa hingpit ang boxing card adtong gabhiuna.

* * *

Kini gikonpirmar ni Daido Angel kinsa nalipay dili lang tungod kay nahunong ang kagubot kundili usab nga duna gihapoy patriotic feeling ang mga tigas nga rioters.

* * *

Matud ni Daido, sama sa riot didto sa Argentina, nanglupad sad ang mga bangko ug botelya sa tubig atol sa lamoklamok didto sa Zamboanga.

* * *

TRIVIA -- Maayong buntag sa atong mga higala diha sa Boljoon ug kasikbit nga mga kalungsuran. Daghang salamat sa inyong nagpadayong pagsuporta sa atong tabloid. (With JVJ)