EDITORYAL - SALN ug ITR ni PNoy kuwestiyonable?

Aw angay kining klaruhon, kay murag mao kini karon ang gikulitog na usab sa mga supporter ni CJ Renato Corona kinsa gilutos tungod sa kadaghan niyang butang nga wa makarga   sa iyang SALN uban sa iyang kinitaan nga wa mapatik sa iyang ITR.

Kun kini nasil-ingan sa mga sagabay ni Corona basin baya tinuod kini unya mahug unya nga ang Pamuno Nasud    nanilhig sa tugkaran sa iyang silingan samtang sa kaugalingon niyang nataran wa siya kapanghinlo, ilabi na nga ulitawo siya, basin tinuod nga nataligam-an lang niya ang pag-atiman sa iyang kinitaan ug kabtangan hinungdan nga wa makarga sa iyang SALN ug ITR.

Kay ang tanan nasayud na nga sa panarbaho sa pribadong mga buhatan, ITR ray gikinahanglan sa usa ka kawani nga iyang isumiter ngadto sa BIR matag tuig, lahi sa nanarbaho sa gobiyerno kay gawas sa ITR, tulubagon usab niini nga ideklarar ang   iyang mga personal nga propriedad matag tuig kun mutakdo ba sa iyang gidawat nga suhol gikan sa salapi sa gobiyerno diha sa iyang SALN.

Mas gawasnon ang pribadong mga kawani ingon man mga negosyante ug self-employed nga mga professional kay ang pangitaon sa BIR gikan kanila mao ra ang ilang ITR matag tuig nga maoy basehan sa bayranan nila sa buhis.

Sa mga self-employed nga professional sama sa abogado, engineer, doctor, ug uban pang professional kansang kinitaan sila ray nasayud, ang gipangita sa gobiyerno gikan kanila mao ang ilang HONESTY kun nagtinarong ba sila pagtug-an sa ilang kinitaan nga basehan sa ilang bayranan sa buhis.

Busa sa mga pribadong tawo way life-style check nga gihimo ang gobiyerno kanila kay gihatagan sila  og libre sa pagpadaghan sa ilang kabtangan basta mohatag lang sila og tukmang buhis sa gobiyerno.

Busa kun si PNoy tinuod nga wa modeklarar sa iyang kinitaan sa iyang ITR ug sa iyang personal nga butang sa iyang SALN, aw nganong di man siya i-impeach usab sama kang Corona. Di ba?