Duha ka dagway sa Sinulog

Sinulog na usab karong Domingo puhon. Ang Sinulog gisugdan tulo na ka dekada ang nakalabay isip kabahin sa kasaulogan sa kapistahan sa balaang bata nga si Señor Santo Niño. Tungod sa ka taas na sa panahon nga gihimo ang Sinulog daghan na usab nga kausaban ang naapil niini apil ang paghimo niining negosyo.

Kun kaniadto libre kang makatan-aw sa mga contingent nga nagsinulog sa kadalanan nga maagian sa rota karon dili na tungod kay gikinahanglan kang mobayad kun gusto nimong makakita sa mga contingent nga misadsad gayod pagmaayo. Gikinahanglan nimong mobayad og tag pito ka gatos aron makasulod ka sa Cebu City Sports Complex diin didto nimo makita ang mga contingent nga magpabonggahay sa ilang mga sayaw ug gimik.

Hinoon kun gusto ka nga motan-aw og libre nga Sinulog puyde kang mag-antos pagpauwan ug pagpainit sa kadalanan nga maagian sa Sinulog pero ang imong makita mao lamang ang mantinil nga sayaw ug ang mga naglakaw lamang nga contingent.

Tungod sa ka taas na sa panahon nga kita nagsinulog, ang Sinulog napun-an kini og laing dagway.

Kun ang imong gusto mao lang gyod ang pagsaksi sa Sinulog ug gusto ka nga daghan gyod og masaksihan puyde kang magpundo ug magsuroy-suroy sa kadalanan o mopalit ka og mahalon nga tiket aron makasulod ka sa Cebu City Sports Complex diin maayo ang imong pagkabutang ug pagkahiluna. Mao kini ang negosyo nga dagway sa Sinulog. Pero kun ang gusto nimo mao gayod ang pagpalapad ug pagpadako sa imong debosyon kang Señor Santo Niño puyde kang mokuyog sa solemn prosisyon karong Sabado diin tapuson kini sa usa ka traditional nga Sinulog diin ikaw mismo ang mosayaw ug magsinulog atubangan sa balaang bata. Mao kini ang libreng Sinulog, ang ikaduhang dagway sa Sinulog dinhi sa Sugbo.

Sa mga dumudoong maayong pag-abot sa kapistahan ni Señor Santo Niño. Ako manghinaot nga malingaw kamo sa inyong pagbisita dinhi sa Sugbo. Pit Senor!