Ayaw'g kasuko Mayor

Nalipay ang mga ginikanan sa mga scholars sa City Hall kay dili na kaayo lisud-lisuron ang ilang mga anak pagkolekta sa tag-usa ka libo ka pesos nga allowance nga ihatag sa kagamhanan sa dakbayan.

Gitataw ni Ester Cubero, consultant on education ni Mayor Michael Rama, nga gihunong na nila pagpatuman ang lagda nga kinahanglang ubanan g’yud sa ilang mga ginikanan ang mga scholars kun kuhaon na nila ang ilang allowance. Sa akong lindog kagahapon sa The Freeman gikwestyon nako ang pamaagi nga paubanon gayud ni Rama ang mga ginikanan sa pagkuha sa P1,000 nga allowance.

Gipasabot nako nga hasol na kini kaayo kay ang pagpanghatag iatul ra ba g’yud atul sa adlaw nga tingtrabaho. Sa ato pa mapugos ang mga ginikanan sa pagpalta sa trabaho.

Pananglit ako maoy mopalta aron lang g’yud makobra ang P1,000 nga allowance para sa akong anak, tabla ra og walay nadawat kay dili na man usab ko masweldohan kay mopalta man g’yud ko sa trabaho.

Samtang magpasalamat ko ug ang ubang ginikanan sa mga Cebu City scholars apan hangyo lang namo nga dili lang kaayo hasul-hasolon ang kabataan ug ang mga ginikanan uy.

Sugyot usab nako nga kinahanglang adto lang sa tunghaan unta ang pagpanghatag sa allowance kay serbisyo man kaha kining ato. Kun ari gud sa City Hall mahimong maka-absent na usab ang mga tinun-an sa ilang klase. Aw hinoon, sugyot ra ning ako ug anaa ra sa mayor ang pagtimbang-timbang kun angay ba nga iyang ipatuman.

* * *

Abi ba kadto nako og nasulbad na ang paglunop dapit sa eskena Bonifacio ug Sikatuna (duol sa Parian), wala pa man diay. Giayo na man gud ang drainage system diha sa maong lugar.

Natan-aw hinoon nako nga ang estero nga gikan sa barangay Kamagayan nga modugtong ngadto sa dakung sapa sa T. Padilla wala pa mapaladmi mao nga maglunop gihapon kun dunay uwan.

Hinay ra baya kadtong uwan niadtong miaging gabii apan wala gayud makasapar sa tubig ang mga esteros.

Sa press conference kagahapon, gibutyag sa mga opisyal sa City Hall nga hayan dugay-dugay pa gayud ang atong pag-antos sa mga lunop tungod sa paglaslas og dakung kantidad sa City Council sa gisugyot nga budget alang sa pagsulbad unta sa problema.

Ingon ani na lang ang angay’ng buhaton sa City Hall. Ang mga sakop sa konseho mipasalig man nga mopagahin sila og dugang budget kun mahurot na og gasto ang gitagana nila nga gahin nga subra sa P100 ka milyon.

Dalia pagpatuman ang gusto ninyo nga mga proyekto unya kun dunay kwarta walay nagpugong sa pagsugyot og supplemental budget. Unsaon nga atul sa budget hearings giangkon man gud ni City Engineer Kenneth Enriquez nga dili niya mahurot sa pagpatuman ang P500 milyones nga budget alang sa pagsulbad sa paglunop sulod lang sa unom ka buwan. Tungod niini wala aprobahi sa konseho ang kinatibuk-ang budget nga gisugyot ni Mayor Rama.

Karon, ibalik na usab ni Rama ang approved budget ngadto sa City Council kay wala matuman ang gilatid nga lagda kabahin sa pagpreparar sa budget. Wala kuno maklaro kun asa magkuha og budget alang sa usa ka gastohanan.

Gusto ni Rama nga ang konseho maghimo na usab og laing special session aron tukion ang gitumbok nila nga kuwang sa approved budget nga gilatid g’yud sa Department of Budget and Management.