Cebu City jail-shabu center

Kun toohan si Sultan kinsa gihulagway sa mga polis nga big time drug pusher murag level up na ang Cebu City Jail. Si Sultan nga nadakpan sa mga polis sa lalawigan sa Sugbo atol sa gipahigayon nga buy bust operation kaniadtong Miyerkules sa miaging semana mitug-an nga ang 25 ka gramos nga shabu nga nakuha gikan kaniya iyang gipalit diha sulod sa Cebu City Jail. Dugang pa ni Sultan nga ang shabu gikan kini sa Manila sa kaulohan ug diha ibagsak sa nahisgotang prisohan. Hinoon kining tanan gipanghimakak sa mga opisyal sa City Jail. Busa kinsa ba ang atong toohan, si Sultan o ang mga jail officials. Kun ako ang inyong pangutan-on, mas motoo ko ni Sultan.

Makapaalarma na ang ginadiling drugas sulod sa Cebu City Jail. Bisan tood og tinood nga kaniadto pa kita nakadungog nga nakasulod ang ginadiling drugas diha sa City Jail, apan wala ikataho nga gipamaligya kini mismo diha sa iyang sulod. Ang mga piniriso nakagamit og ginadiling drugas tungod kay dad-an sila sa ilang mga dalaw pinaagi sa pagpalusot. Wala gyoy nakahimo sa pagpamaligya og ginadiling drugas kaniadto sulod sa Cebu City Jail. Karon level up na sila tungod kay wala lang pasudla sa mga jail officials ang ginadiling drugas diha sa City Jail, ila pa gyod kining gihimong merkado.

Kun si kinsa ang nagtugot ug nagpasiugda sa paghimo sa Cebu City Jail nga merkado sa ginadiling drugas, usa siya ka maayong magpapatigayon tungod kay nakita gyod niya ang maayong merkado sa shabu. Sigon sa pagtoon 65-70 por siyento sa mga nasulod sa prisohan nalambigit sa ginadiling drugas busa makaseguro siya nga mahalin ang iyang baligya. Ang pagpamaligya og ginadiling drugas sulod sa Cebu City Jail dili basta-basta, nanginahanglan ka niini og padrino ug labing seguro taas ra usab nga opisyal diha ang padrino sa tawong namaligya og ginadiling drugas.