EDITORYAL - Ang planetang nadiskobrehan sa NASA

Matag higayong makadiskobre ang mga scientist og mga bag-ong planeta sud sa universe gawas sa eksistido na nga 9 ka planeta kauban sa atong kalibotan nga Earth, mahinumdoman nato ang planeta nga giandam sa Dios dungan sa pagtukod Niya sa atong kalibotan.

Kining planeta nga napatik sa front page sa The Philippine Star niadtong Decembre 7, 2011 nga maoy labing bag-o nga nadiskobre sa NASA pinaagi sa ilang bag-ong teleskopyo nga   gitawag nga Kepler telescope giingon nilang susama gyud og kahimtang ug temperature sa Earth nga atong gipuy-an nga sarang kaayong kabuhian og mga butang may kinabuhi sama sa tawo, hayop ug uban pa.

 Ginganlan kini sa mga scientist sa NASA nga Kepler2b, nga matud pa sama sa atong kalibotan nga batoon usab, apan may gidak-ong doble sa gidak-on sa atong planetang Earth.

Sa tanang planeta nga eksistido gawas sa Earth, ang moon o buwan  mao pay nabisitahan sa tawo apan deduso sila kun mabuhi ba gyud ang tawo didto.

 Unya   ang kadako sa gasto sa mobiyahe ngadto sa maong planeta , ang pagmontar didto sa pagpuyo ug panginabuhi, usa baya ka dako kaayong problema sa tawo.

    Maayo man ning Earth kay pagkatawo nato montada na ang tanan, kay una ibutang sa Dios si Adan ug Eva didto sa tanaman sa Eden, kompleto naman ang maong harden alang sa tawong iyang gipapuyo.

Hayahay kaayo sila si Adan ug  Eva kaniadto kay   nagpaturok daan ang Dios og kahoy kansang bunga maoy pagkaon ni Adan ug Eva, unya wa sila manginabuhi apan nabuhi sila.

Sumala sa Biblia, may giandam ang Dios nga planeta nga walay dagat nga di kinahanglang mosakay ang tawo og rocket aron motugpa didto sama sa mga astronaut nga misakay og spaceship paingon ngadto sa buwan.    

Gitawag sa Dios nga bag-ong langit ug bag-ong yuta, bag-ong lungsod ug bag-ong Jerusalem nga papuy-an Niya sa mga tawong Iyang giisip nga mga anak nga nag-alagad Kaniya sa una pang panahon ug hangtod karong panahona dinhi sa yuta.

Sumala sa Biblia sa pagbalik ni Kristo , tanan sa maong mga pinili sa Dios nga nangamatay ug buhi nga Iyang hiabtan, sa usa ka pamilok mosugat Kaniya sa kapanganoran aron mag-uban sila ngadto sa bag-ong planeta o kalibotan nga giandam sa Dios. Mura lang og di tinuod no. 

Di ba?