Ang pangutana sa akong estudyante

Niadtong nagtudlo pa ako sa subject nga Ethics nahimong kabahin sa among diskusyon ang mahitungod sa mga kaigsuonan natong nahisakop sa third sex. Siya nangutana: “Padre sala ba gud ang mamahimong bayot?” (homosexual orientation). Ako siyang gihatagan ning maong indirektang tubag.

 “Unsaon ta man kun mao na ang ilang kinabuhi apan mas haom ug tukma nga dili gyud sila unta mamayot.” (homosexual practices/practising homosexuals). Isyu kini nga nakahatag og igong pagtagad dili lang sa moral nga baruganan sa Simbahan kun dili apil na usab ang atong katilingban.

Ang pangutana mao: “Nganong nidagsang man hinuon karon ang niladlad sa ilang kaugalingon ingon mga babaye sa lawas sa usa ka lalaki?” Hamtong ba nga ato silang ikondenar na lang sa hingpit gumikan sa ilang kahimtang?

O pasagdan na lang ba hinuon nato sila nga moladlad apan dili magiyahan ug mahatagan og kahigayonan nga mopadayag sa ilang tingog ug hunahuna? Tawhanon ug moral nga sila patingugon, paminawon ug palihokon hinuon segun sa latid sa sukaranan sa tawhanon ug Diosnon nga balaod.

Ang nahitabo man gud mao nga nahilansang lang gyud ang kadaghanan sa sexualized behavior sa mga tomboy ug bayot apan nahikalimtan ang mas halawom nga Psycho-sexual needs nga nalambigit niini.

Kay ngil-ad naman daan ang panlantaw, nagpabilin na lang gyud ning ngil-ad sa hunahuna ug kasingkasing sa kadaghanan. Gani, dunay nag-ingon nga mas maayo pa kuno ang fornication kay sa perversion. Ug bisan kun ingon ini ang ilang pagkatawo, apan dagway ug kasamahan sila sa Dios nga angayang tahuron ug giyahan.

Ayaw ikaulaw nga ikaw ingon ana apan timan-i pud nga dunay limitasyon ang tanan. Maayo unta nga dunay apostolado alang kanila ang simbahan nga pagadumalahon sa usa ug sama kanila sa laray ni Melkesidek.