Ang kamatayon ingon nga abling sugilanon

Usa sa mga himuon dayon kun dunay mamatay sa aksidente mao nga dalidalion gyud og pagkuha ang minatay aron hipuson ug andamon alang sa usa ka haya. Sa India lahi, tungod kay dugay man kuhaon mao nga makita nato ang mga tagtungod nga magbangotan, mohilak ug magminatay atubangan sa publiko nga miambit usab sa maong sentimento.

Ang kamatayon diay dili usa ka tinagong kamatuoran hinunoa, usa ka abling sugilanon nga angayan natong dawaton uban ang kamanggihatagon ug kaandam. Kay lagi, adto man gyud ta padulong bisan unsay atong himoon pa.

Sa akong pagsud-ong sa mga libro nga akong natigom sa panahon nga ako estudyante pa ug sa lima ka mga katuigan sa akong ministeryo makaingon ko nga daghan na sila. Bug-at na sila ug kapoy na kaayo silang dad-on sa akong pagbalhin-balhin.

Apan bisan pa man sa ilang kabug-at, dili ko makaako nga ako lamang silang biyaan sanglit, sumpay man sila sa akong kinabuhi ug sila ang akong kinabuhi panahon sa akong kasub-anan. Sila ang nagpahinumdom kanako nga ang kinabuhi bisan sa iyang kamubo ang makatudlo kanato og daghang mga butang. Apil na niini ang kamatayon. Ang kamatayon ingon nga usa ka abling sugilanon, alang nimo ug kanako.

Mga pulo na lang tingali ka bayranan, maimpas na ang akong St. Peter’s Plan. Ingon man, akong gisusi kun kanus-a na pud mo-due ang akong Abundance Plus nga Insurance aron kini kabayran. Akong gisusi ang akong mga nahimo, maayo ug dautan, akong gipamalandongan ang akong bili ug pulos ning kalibutan. Bisan pa man kun duna ako’y nakab-ot apan kining tanan sa tukmang panahon akong talikdan. Ang akong gitinguha karon mao nga akong panggaon ang akong kaugalingon nga nahimong wala mapangga gumikan sa pagpangga sa uban. Kini aron dili siya kamahay sa katapusang gutlo sa iyang pagginhawa.