Comelec inutil

Nganong hangtud karon wala pa man gayud maresulbar sa Commission on Elections (Comelec) ang election protest ni Mayor Ritchie Wagas sa lungsod sa Compostela? Hapit na usa ka tuig ug tunga apan wala pa gayud makahukom ang Comelec kun si kinsa gayud ang tinuod nga mga mananaug sa maong lungsod human maproklamar si mayoralty candidate Joel Quinio ug iyang mga konsehal.

Samtang nagtrukis kining duha ka habig ang mga molupyo sa Compostela mao ang nag-antus. Wala na mahatag ngadto kanila ang batakang serbisyo sama sa pagmintinar sa sugang dagitabnon, karsada (labi na sa mga barangay sa kabukiran) ug ang pagpatuman sa mga proyekto nga makahatag unta og kaayuhan sa mga lungsuranon.

Grabe kining nahitabo sa Compostela kay wala man gayuy bisan usa ka piniling opisyal ang naglingkod sa munisipyo. Kini maoy ehemplo sa ka-inutil sa Comelec central office. 

* * *

Nagrigor gayud ang hunahuna ni Bise Mayor Joy Augustus Young tungod sa pag-asumir ni Mayor Mike Rama sa pagka-chairman sa Cebu City School Board apil na ang college scholarship program. Sa iyang kalagut iyang gitawag ang mayor nga "dawat og limpiyo."

Ngano man diay si Young ra ang maantigo'ng mopadagan sa school board ug sa college scholarship program? Ang school board ubos sa pagpangulo sa mayor ug ang college scholarship program ubos sa maong board. Si Mayor Mike usa ka abogado ug usa ka eksperto sa human resources management sa wala pa siya mosulod sa politika, unya wala na hinoon siyay alamag sa pagpadagan og simpli kaayong scholarship program?

* * *

Gihugtan karon ang pagpatuman sa Comprehensive Anti-smoking Ordinance of the City of Cebu. Gipanguluhan kini ni Dr. Lucelle A. Mercado.

Nasayran sa mga pagtoon nga ang tawong hinabako kadaghanan masakit niining mosunod - cancer, sakit sa kasingkasing, osteoporosis kon pagkagabok sa kabukugan, stomach ulcer, psoriasis, emphysema, hearing loss kon pagkabungol, wrinkling kon pagpangunot sa panit, cataract, hair loss kon pagpangatagak sa buhok, discoloured fingers kon lagum ug hugaw nga mga kuyamoy, pagkabaog ug uban pa.

Apan adunay mga dagkung opisyal sa gobiyerno nga kusog kaayong manabako inay mao unta ang modelo sa katawhan. Kun wala sila’y will power sa paghunong sa ilang bisyo labaw nga sa pagpugong sa ubang mga tentasyon sa kinabuhi.

* * *

Sumala ni Bella Ruby Santos, usa sa mga akusado sa pagdagit-patay kang Ella Joy Pique, nga nagsigi lang siya og suroysuroy sa nagkalainlaing dapit sa nasud sukad gipakanaug ang warrant of arrest batok kaniya. Makalagot kini kay nagpakita kini sa kahaguka sa intelligence branch sa kapolisan sa pagpangita sa nahimutangan ni Santos.

Nagpasabot usab kini nga kompiyansa ra kaayo si Santos nga walay mahitabo kaniya bisan pa sa pagsigi og pagarpar sa mga pulis nga nasayud sila kun diin nagtago ang akusado. Ako nagtoo nga ang reward money maoy nakatabang sa pagtudlo sa nahimutangan ni Santos diin siya nasikop sa mga sakop sa National Bureau of Investigation (NBI).

* * *

Human sa pipila ka buwan nakong paghisgut sa natural product nga Transfer factor daghan na kaayong nagpasalamat kanako tungod kay nakahupay kini sa ilang gibati'ng mga sakit.

Si Pito Teves, usa ka Fil-Am nga atua na magpuyo sa Honolulu, Hawaii kanunay nga mopaambit sa maayo niyang kasinatian sa maong produkto ngadto sa iyang mga higala. Karong umaabut nga mga adlaw akong hinganlan dinhi ang inilang mga tawo nga nakauyon sa maong produkto.

* * *

Email: [email protected]