4th Charter Day sa Naga City

Akong mga pahalipay sa mga Naganhon!

Karong adlawa, Lunes, wala na gyuy makapugong sa pagsaulog sa ika-upat nga Charter Day sa atong Naga City dinhi sa lalawigan sa Sugbo.

Malipayon kaayo ang amahan sa maong siyudad nga si Mayor Valdemar “Val” Chiong nga wala nay babag ang ilang pagsaulog sa Charter Day human ang Korte Suprema “final” na nga midesisyon nga usa na gyud ka city ang Naga.

Apan akong huwaman ang prinsipyo ni Mayor Val, kinsa matud niya nga wala man maundang ang pagka-city sa Naga bisan niadtong kiha sa League of Cities, ug samtang giundang sa Department of Budget and Management ang paghatag sa Internal Revenue Allotment (IRA) isip usa ka siyudad.

Matud ni Mayor Val nga human ma-final ang desisyon sa Korte Suprema, wala nay kahadlok nga nagbabag sa ilang agianan paingon sa kalambuan.

Direksiyon sa Naga city ang paghimo sa usa lugar nga usa ka “industrial hub.”

Anaa usab sa maong lugar ang labing unang malampuson nga waste segregation facility nga nagserbisyo dili lamang sa Naga, kun dili sa uban usab nga mga lugar.

Congratulations ug happy 4th Charter Day, mga Naganhons!

* * *

Ang Rotary Club of Cebu – Minglanilla mopahigayon sa labing unang election of officers karong Septiyembre 10, adlaw’ng Sabado sa alas 7 sa gabii anha sa kumbento sa Immaculate Heart of Mary Shrine sa lungsod sa Minglanilla.

Pangulohan ang maong eleksiyon sa umaabot presidente nga si Jigger Cañedo, sa inahan niini nga si Lumen Cañedo ug sa team moderator sa team ministry sa simbahan sa Minglanilla nga si Fr. Jojo Deligero.

Sa Septiyembre 11, Domingo sa buntag, ang RCC – Minglanilla magpahulagway sa simbahan, uban ang mga “clienteles” niini nga mao ang mga mag-uuma sa mga barangay Cadulawan ug Vito kinsa mga benepisyaryo sa proyektong gisugdan sa maong Rotary club.

Talagsaon kining maong Rotary club tungod kay ang focus niini mao ang pag-alalay sa mga mag-uuma sa kabukiran, ilabi na sa Minglanilla, nga molambo sa ilang pagpuyo pinaagi sa pagpalambo sa ilang mga pamaagi sa pagpananom.

Dili politikal ang katuyoan sa maong proyekto, apan aktibong nag-abag niini ang kagamhanan sa lungsod sa Minglanilla pinaagi ni Mayor Eddie Selma ug sa konseho niini, ang kapolisan sa lungsod.

Si Kapitan Boboi Geonson mainiton kaayong midawat sa RCC-Minglanilla sa nataran sa barangay aron motuon sa mga panginahanglan sa mga residente sa barangay, ilabi na nga tumong sa maong Rotary club ang paghimong “agro-tourism” sa barangay Cadulawan.

Sumala pa sa usa sa mga karaang residente nga si Antonio “Tonyo” Ababon, ang barangay Cadulawan sa Minglanilla paborito nga “cycling site” sa mga mountain bikers tungod sa kaanindot sa karsada niini paingon sa ibabaw (Cadulawan proper) diin adunay “stop site” diin mahimong makapahulay ang mga bikers samtang mo-lantaw sa kaanindot sa kabukiran sa isigka-kilid, gawas sa mabugnaw ug presko nga huyop sa hangin.

Si Jigger Cañedo, iyang inahan nga si Mam Lumen, Fr. Jojo ug si Kap Geonson nakakita sa dako nga “local tourism potential” sa maong lugar, apan kinahanglan pa nga i-develop aron makabutang og uban pang mga site nga mahimong kahunongan ug kabisitahan sa mga turista.

* * *

Malampuson ang pagduaw ni Presidente Noynoy Aquino sa China. Mokabat sa P13 bilyones ang aktuwal ug posibleng investment nga makuha sa Pilipinas sa iyang pagduaw sa China.

Si Senador Joker Arroyo, usa sa paboritong kritiko ni Noynoy, natagbaw sa maayong mga kalambuan nga nakuha sa state visit sa China.

Iyang gipakadako ang “goodwill” nga nakuha, gawas nianang investment. Goodwill, tungod kay matud ni Joker human na kita maulawi sa China human niadtong hostage crisis sa Manila nga mikalas sa pipila ka mga turista gikan sa Hong Kong. Unya, nangisog usab kita og balik sa atong pag-claim sa Spratlys.

Pero, dinhi sa nasud, daghan og nabiyaan si Noynoy. Kana lang suliran sa Bureau of Customs wala gihapon mahuman. Nakabutang man tuod og commissioner nga alyado ug masaligan, apan wala usab mo-perform si Angelito Alvarez.

Karong semanaha, madunggan na tingale gikan sa baba sa presidente kinsay sunod nga customs commissioner. Apan maayo unta nga ang mosunod nga commissioner mo-review nianang “existence” sa mga nagkadaiyang opisina sa mga puerto nga wala kinahanglana ug nagdugang lamang sa bureaucratic red tape, ilabi na kanang Intelligence Group, Enforcement Group, AOCCG, Run After the Smugglers (RATS).