Banagbanag sa bag-ong ugma

Nakugang ug nibilib ang nasud sa gihimo ni Senador Juan Miguel Zubiri nga pagdemitir isip sakop sa Senado taliwa sa pasangil nga nakabinispyo siya sa lapad nga tikas atol sa 2007 senatorial elections.

Tungod sa pagtumaw og balik sa pasangil sa pagpanikas human mopatim-aw si kanhi Maguindanao election supervisor Lintang Bedol ug sa pamahayag ni kanhi ARMM Gov. Zaldy Ampatuan naapektuhan og maayo ang pamilya ni Zubiri.

Sigun pa niya nga nabutang sa kauwawan ang iyang pamilya tungod sa pasangil ug nga nakaapekto na kini sa iyang trabaho isip senador sa nasud. Tungod kay alang niya dili naman siya mamahimong pektibo isip senador mas gipili ni Zubiri ang moluwat sa katungdanan kay sa magpabaga sa iyang nawong.

Gipamatud-an ni Zubiri nga duna pay nahabiling mga politiko sama niya nga kamaong mauwaw. Gihatagan ni Zubiri og dyutay’ng paglaum ang katawhan nga wala pa diay hingpit mosawop ang adlaw sa kahigayonan nga mausab ang sistema sa politika sa atong nasud.

Gawas nga nikanaog siya isip senador giatras na sab niya ang iyang counter protest batok sa iyang karibal nga si Manlalaban Koko Pimentel. Buot ipasabot niini nga kun mapildi siya sa protesta nga gisang-at ni Pimentel iya nang hingpit giabandonar ang kahigayonan nga kwestiyonon ang resulta sa protesta.

Sa ato pa nga kun duna pay panahon ug mahuman og sayo-sayo sa Senate Electoral Tribunal ang proseso ug madeklarar nga midaog gyud si Pimentel wa nay makapugong pa sa iyang paglingkod aron tiwason ang nahabiling termino hangtud sa 2013.

Apan kun dunay nisaludo sa gihimo ni Zubiri duna say wala makaayon ug nanaway sa iyang gihimo. Matud sa uban nga ang iyang pagluwat usa ka pag-angkon sa iyang pagpanikas.

Apan alang nako bisan unsa pay nagtukmod ni Zubiri pagluwat sa katungdanan kuwang ni aron habolan ang maayong ehemplo nga iyang gihatag ngadto sa ubang mga politiko sa atong nasud.

Dili nato kalimtan nga mahimo unta kaayo ni Zubirri nga modukot sa Senado ug langayon ang proseso hangtud nga mahuman ang giprotestaan nga termino aron bisan kun modaug pa si Pimentel dili na gyud kini makalingkod.

Dili sagad nga buhaton sa hakog nga politiko ang gihimo ni Zubiri. Ang sagad natong mabantayan sa mga politiko mao nga bisan kun klaro na kaayo ang ebidensiya sa tikas ug pangurakot dili pa man gyud gani mokanaog. Makig-away pa hangtud sa labing taas nga hukmanan aron lang magpabilin sa pwesto.

Hinaut nga ang gihimo ni Zubiri maoy sundon sa ubang mga politiko sa nasud ta. Kun kini mahitabo, tingali dili na layo alang sa katawhang Pilipino ang pagsubang sa bidlisiw diha sa banag-banag sa bag-ong ugma.

* * *

[email protected]