Misteryosong mga barko

Ang Cebu Goat and Sheep Raisers Association, Inc., grupo sa mga namuhi ug nag-breed og kanding dinhi sa Sugbo, daghan kaayo’g nakat-onan sa “farm visit” niadtong Sabado didto sa Barili.

Barili Goat Farm nga gipanag-iya sa contractor nga si Ed Aguilar ang giduaw sa asosasyon.

Ang mga opisyal sa CGRASS nga sila si bise presidente Ed Durango, secretary Aimee Almeida, treasurer Marlyn Impas, PRO-north Louie Sanchez, ug marketing officer Jerry Yap miuban sa duha ka bag-ong mga sakop sa asosasyon sa pagduaw sa goat farm ni Aguilar.

Si Aguilar, uban sa lain pa nga mga goat raisers sama ni Ildy Suerte sa Princess Goat Farm sa Banhigan, Badian, Jun Baguio sa Cordova ug uban pa, aktibo nga nagtabang sa mga bag-ong nanganding.

Gani, bukas ang ilang mga farm alang sa mga bag-ong nagtuon sa panganding. Ang Barili Goat Farm nahimong model farm sa asosasyon tungod kay gawas nga anaa kaniya ang maayo nga breed sa kanding sama sa Anglo-Nubian ug Saanen x Anglo-Nubian, makita usab ang maayo nga farm practices and management ug kumpleto sa mga tanom nga pagkaon sa kanding.

Alang sa mga gustong makat-on sa pagpanganding, mahimo kamong motawag sa mga eksperto niini sa Department of Agriculture (DA-7), sama nilang Em-Em Bagares ug Amando Titong. Mahimo usab ma-estorya silang Ed Aguilar, Ed Durango, Al Barba, Louie Sanchez o Ildy Suerte pinaagi sa asosasyon nga mahimo usab makontak pinaagi sa DA-7.

* * *

Maayong i-alerto nato ang mga sakop sa Philippine Coast Guard niining mga foreign vessel nga dili modunggo ug magpa-utaw-utaw lang ug magpaatbang sa pier 5 o 6.

Base sa impormasyon nga atong nadawat nga aduna kini karga nga mga bugas humay imported gikan sa Vietnam nga ubos sa allocation sa National Food Authority. Kun adunay allocation gikan sa NFA, nganong dili man molahos og dunggo sa atong pantalan diha sa Cebu International Port (CIP)?

Magduda kita nga adunay misteryo nga gihimo kining mga barkoha. Dili ko motuo, apan maayong susihon sa mga sakop sa Coast Guard nga adunay mo-shipside nga mga langyaw’ng barko aron itagak ang pipila ka sako nga bugas nga sobra sa alokasyon nga metric tons.

Alang sa wala masayod, ang NFA nanghatag og allocations ngadto sa mga negosyante. Ang allocation sinukod pila ka metric tons, apan sa report nga atong nadawat, pasobrahan kini sa mga negosyante. Maayo tingaleng susihon kun wala bay overloading o lain nga karga nga itambog.

Apan sa akong pagsabot, kining mga barko nga magpa-utaw-utaw susihon man gyud kini ilabi na kun kadudahan ang gidugayon niini atbang sa pier.

Samot nga bantayanan kini panahon sa kagabhion, basin og adunay mga milagro nga manghitabo.

* * *

Kini si Ermelinda Abadiano nga nangangkong maoy presidente sa National Confederation of Barangay Health Workers of the Philippines aduna pa ba kini barangay sa siyudad sa Sugbo nga giserbisyohan?

Mahimo ba diay nga usa ka barangay health worker ang usa ka tawo kun wala kini barangay nga giserbisyohan?

Apan naglibog ko nganong ang mga opisyal sa City Health Department sa Cebu City Government padayon nga nag-recognize kang Abadiano bisan nakahatag na kini og kalibog ug kasamok sa asosasyon sa mga BHW sa siyudad tungod kay dili kini gustong magpapuli sa iyang liderato.

Tanang organisasyon sa BHW sa rehiyon ug probinsiya giangkong maoy gigunitan niining Abadiano. Nasayran nato nga adunay gipaningil nga P130 kada BHW nga registration and accreditation ang grupo ni Abadiano. 

Sa kadaghan sa mga BHW sa rehiyon ug lukop nasud, pila na ka milyon ang ilang nakolekta. Sumala sa atong nasayran, nag-isyu og resibo ang grupo ni Abadiano, apan sumala sa certification ni revenue dictrict officer Clotilde Menchavez sa Bureau of Internal Revenue (BIR) District No. 82 nga pintesahan Hunyo 15, 2011, wala marehistro ang TIN number sa mga resibo, sa ato pa, wala marehistro sa BIR.

Si Mayor Mike Rama maayong mopasusi niining suliran sa mga BHW sa siyudad nga giingong gilisudlisod sa grupo ni Abadiano.

Gani, ang presidente sa mga BHW sa siyudad sa Sugbo nga si Gavino Uy sa barangay Pari-an nakadawat og mga pagpanghulga sukad niya gikuwestiyon ang kalehitimo sa grupo ni Abadiano.

Kun wala nay barangay nga girepresentahan si Abadiano, mahimo ba pa siyang ilhon nga BHW?

Kun tugotan sa City Health Department ang practice nga bisan walay barangay mahimo ra nga i-recognize nga BHW, momugna kini og kasamok, ug kun tungod kini sa koleksiyon sa registration ug uban pa, mobukas kini sa baha sa korupsiyon.