NFA kakonsabo sa mga smuggler?

Lab-as pa kaayo sa atong panumdoman ang mga pasiatab ug mga pagsaway ni National Food Authority Administrator Lito Banayo batok sa kagamhanang Gloria Macapagal Arroyo tungod sa Rice importation program niini. Gani aron molig-on ug adunay basihanan ang iyang mga pagsaway mi-commission pa ang iyang buhatan og usa ka audit team aron maoy motan-aw sa Private Sector Financed Importation program sa kagamhanang Arroyo. Legalized Smuggling ang nakita sa audit team nga gisugo ni Lito Banayo sa pagtan-aw sa Private Sector Financed Importation.

Ang kopya sa report nga gipreparar sa tulo ka tawo nga audit team nagkanayon nga ang gipatuman nga Private Sector Financed Importation nga gisugdan kaniadtong 2008 hangtod sa 2010 usa ka dakong bayranan ug alkanse ang gobyerno. Ang pagpatuman sa Private Sector Financed Importation epektibo kining mihimong legal sa smuggling operation sa nasud nga miresulta sa pagka utang-utang sa National Food Authority nga mikabat ngadto sa 10 bilyones ka pesos.

Ubos sa Private Sector Financed Importation program ang mga negosyante kauban ang mga kooperatiba sa mga mag-uuma gitugotan nga makaangkat og bugas sa gawas sa nasud aron adunay igong supply sa bugas ang Pilipinas. Subay ning maong programa ang mga negosyante og bugas pabayron og service fee sa National Food Authority aron makakuha kini og card on a first come first-first serve basis ug dili na pabayron og buhis sa Bureau of Customs. 

Tungod niining maong programa ang mga smuggler og bugas misakay ug nakapahimulos pagmaayo, mikita ug mipaburot pagmaayo sa ilang negosyo nga walay bayad-bayad og buhis sa gobyerno. Mao kini ang hinungdan nganong gisaway pagmaayo ni NFA Administrator Lito Banayo ang nahisgutang programa nga gipasiugdahan ni kanhi pangulong Gloria Macapagal Arroyo.

Karon ang maong programa nga gisaway ni Angelito "Lito" Banayo mao ra usab ang susamang programa nga iyang gipadayon karon. Kun sa panahon ni Gloria Macapagal Arroyo aduna pay nahabiling gamay nga pang alkontra sa harap-harapan nga smuggling operation sa mga smuggler karon wala na. Kun kaniadto makaila ka pa sa pinalusot nga bugas ug dili karon dili na. Kun ang giangkat nga bugas gikan sa gawas sa nasud nga may pagtugot sa NFA gisulod kini og sako nga adunay marka nga NFA karon wala na. Busa dili ka na makaila kun ang bugas nga anaa sa imong atubangan pinalusot ba kini o dili ba.     

Unsa man kahay nakapausab sa hunahuna sa atong National Food Authority Administrator nga si Angelito "Lito" Banayo? Nganong iya mang gipadayon ang programa ni Gloria nga nasuta nang dugokan sa pagpangawkaw ug smuggling operation. Silaw ba ugod kaayo ang salapi sa mga smuggler nga mipunting sa mga mata ni Banayo hinungdan nga wala na siya makakita sa interest sa gobyerno ug katawhan nga iya untang panalipdan?

Sa iyang gihimo nga pagpadayon sa Private Sector Financed Importation program sama ra nga nakigkonsabo si NFA Administrator Angelito Banayo sa mga smuggler.