EDITORYAL - Ang mamareglahay

Matag higayong makabasa ta sa mga balita bahin sa pamaregla sa mga grupo sa mga batan-on, mosantop dayon sa atong hunahuna ang pangutana, naa pa diay na ron?

Kay kini gud nga mga buhata, mao man kini kontra sa mga grupo nga gitawag nga vigilantes.

Mapugos paghugpong ang mga vigilantes aron ipanimawos kadtong mga inosente nga mabiktima niining mamareglahay, sama sa mga tulisan, snatcher ug uban pang kriminal.

Kay kasagaran niining mga batan-ong mamareglahay, anha mag-estambay sa daplin sa karsada , unya mag-inom, o kaha magsuyop og ginadiling drugas, unya ang mga inosente intawong mangagi pareglahan og kulata o kaha dunggabon o kaha pusilon 

Taym pa sa mga dapit nga anaa kanang problemaha, kumusta ang mga opisyal diha, nagbantay ba sila sa ilang lugar o kaha nagpaka buta bungol lang sa mga binuang sa ilang molupyo.

Ang ilang mga tanod wala ba diay panahon sa pagpatrolya sa mga dapit nga estambayanan sa mga batan-on nga mamareglahay?

Kanang grupoha, sayon ra kaayong mabantayan, kun ikaw nga kapitan, konsehal o tanod sa barangay nagpakabana sa inyong obligasyon ug responsibilidad sa pag-atiman sa kahusay ug kalinaw sa inyong dapit.

Hinuon kun surambawon ninyo ang inyong mga molupyo, buot ipasabot nga pasagdan lang ninyo kay di man kamoy pareglahan, basin baya kun sa inyong pagkadanghag, kamoy pahimungtan sa gitawag nga vigilantes.

Kay kadtong mapareglahan sa inyong dapit mangita to og paagi nga pamatyon kanang mga grupo sa mga batan-on sa inyong lugar nga tigpamaregla, unya kun di makontento basin apilon pa mong mga opisyal diha nga wa magpakabana sa dautang binuhatan sa inyong mga molupyo.

Sa mga tulisan o kaha negosyanteg ginadiling drugas, mahimong magpaka buta bungol mo basin makakuwarta pa mo kun mabahinan mo sa ilang kinitaan.

Apan kanang tigpamareglahay sa inyong lugar kun di mo makadisiplina niana, may dakong kalagmitang mapagan mo kun may mga mabiktima diha nga maghuramentado. Di   ba?