Bantay sa inantigo

Angay unta nga tan-awon pag-ayo sa mga sakop sa konseho sa dakbayan sa Sugbo kun maayo ba nga dawaton nila ang gisugyot nga pagdonar og yuta ni kanhi gobernador Emilio “Lito” Osmeña nga gigamit karon isip karsada diha sa barangay Busay.

Nasabtan gud nako nga ang maong yuta nga idonar ni Lito mao man ang karsada paingon nianang pribadong suroyanan sa bukid nga siya ang tag-iya. Kun dili nimo hinuktokan pag-ayo, malipay ka kay tiaw mo idonar ang kabahin sa iyang yuta.

Apan isip beteranong sakop sa media dili dayon ko modayeg niining pagdonar og yuta ni Lito sa dakbayan sa Sugbo. Kun ang yuta nga iyang idonar mao ra ang gigamit nga karsada paingon sa iyang negosyo o kaha balay, walay kapuslanan.

Ang epekto gud kun ang usa ka pribadong karsada idonar nimo sa kagamhanan, ang gobyerno na maoy moatiman niini. Maayo unta kun ang maong karsada nga idonar ni Lito paingon sa dapit nga daghang mga tawo nga nagpuyo.

Apan kun ang dapit nga padulngan sa karsada mao ra ang iyang negosyo o kaha balay, daku kining kwestyonable. Angay kini nga tan-awon pag-ayo sa atong mga opisyal kana kun naglantaw sila og maayong pangagamhanan.

Awhagon nako si Konsehal Alvin Arcilla nga maoy nangamahan sa resolusyon nga pahatagan og pagtugot si Mayor Michael Rama nga mopirma og kasabutan ni Lito nga ipasabut niya pag-ayo kining maong isyu.

Kun ang karsada gani nga paingon sa naila na kaayo nga TOPS maoy buot idonar ni Lito, uy mora’g negosyo man kana niya. May entrance ang mosulod diha unya ang mga baligya pwerteng mahala.Maayo unta og mag-inabtik ang atong mga konsehal aron dili kay ang dakbayan maoy mogasto sa pag-atiman sa karsada nga paingon ra sa pribadong negosyo ni Lito.

* * *

Uy, kamong mga drayber sa mga passenger jeepneys ug mga taxi tumana g’yud ninyo ang gilatid nga uniporme para ninyo ha?

Panahon na nga estriktohon namo pagpatuman ang gilatid sa Land Transportation Franchising and Regulatory Board (LTFRB) kay nangolekta na gud mo og mahal nga pletehan. Kun ako ang makasakop, dili g’yud ko mopasaylo kun masakpan nako nga walay uniporme, magpurol ug mag-sinelas. Kun dili mag-siga ang suga sa atubangan ug luyo labaw na nga walay pasaylo.

Kun mosiga apan tuyoon nga dili pasigaon, samot nga dakpon ko kamo og reckless driving kay ang wala ninyo pagpasiga sa suga makamugna og disgrasya.

Nganong ang mga pribadong sakyanan magpasiga man lagi og suga unya kamong mga PUJ driver dili man? Unsa nga matang kanang inyong utok nga ang uban magtuo nga makadaginot mo’g gasolina kun dili pasigaon ang suga?

Hunonga na usab ninyo ang paggamit og duha ka switch alang sa headlight ug lain usab sa tail kon rear light. Daghan ra ba kaayong mga drayber ang dili makasabot og tail or rear light. Paita! Unsa, mga pinalit nang inyong lisensya? Wala mo’y seminar? Ang nakat-onan ninyo mao ra g’yud ang pagpadagan ug pagpaatras sa sakyanan?

Usbon nako, sa mga checkpoint operation sa LTO Task Force Alpha ayaw kamo kahadlok kay dili kami mga kurakot, dili kami mangilkil o mangayo’g kwarta ninyo, apan modakop g’yud mi nga walay langay-langay.

Dili kami sama anang uban nga maghuwat aron tunolan kay ang among tumong mao ang pagtudlo og leksyon sa mga drayber.