EDITORYAL - Ang oil subsidy ni P-Noy

Alang sa mga hingtungdang grupo nga makapahimulos sa oil subsidy nga giandam sa Malacanang , dalaygon kaayo ang lakang ni P-Noy.

Apan bisan pa ning maayong tinguha sa Pamuno nasud, may mga tigpaniid pang wala ganahi niini, kay alang kanila , kun maghatag og subsidiya ang gobyerno alang sa asayte, kinahanglang tanang motorista hatagan usab niini .

Kini tungod kay alang kanila dili patas kun ang oil subsidy itunol lamang ngadto sa mga sektor sa mga drayber ug operator sa PUJ ug traysikol.

Kay kun dinhi lamang itutok sa gobyerno ang maong kaayohan, magmahay ang mga pribadong tawo nga may mga sakyanan, kay alang kanila magbubuhis usab sila sama sa mga tag-iya og PUJ ug trasysikol ug sa mga drayber niini.

Hinuon may katarungan usab ang mga tigpaniid sa ilang komentaryo kalabot ning butanga.

Apan angay masayud ang tanan nga usa lamang ang tinguha sa kagamhanan ning maong lakang,   nga mao ang pagsanta sa hunahuna sa mga operator ug drayber sa mga sakyanan pasaheroan gikan sa matag karon ug unya nga paghasol sa mga sumasakay pinaagi sa lakang nga pagpaumento sa plitehan.

Kini tungod kay pinaagi ning maong suporta sa gobyerno mahunong ang laraw sa mga drayber sa pagpangayo kanunay og umento sa plitehan kay ang tinuod nga epekto sa tibuok kalibotang pagsaka sa presyo sa asayte di man nila mabati kay sagngon man sa subsidiya nga ihatag kanila sa gobyerno.

Di lamang mga ordinaryong sumasakay ang apiktohan kun mosaka ang plitehan kundi bisan ang mga produkto o mga baligya nga ikarga sa maong mga sakyanan.

Kun mosaka ang plitehan sa mga produkto nga baligya, mosaka usab ang presyo niini, ug way laing magbaguod  sa epekto niini kun di ang tanang pumapalit, ma-adunahan man o kabus.

Apan kun di moumento ang plitehan sa mga pasahero, di kaha moumento ang presyo sa mga palitonon bisan wala kini ikarga og PUJ o traysikol? Di ba?