EDITORYAL - Ang mga OFW sa gawas

Ang pagpabilin sa daghang mga nurse sa Libya luyo sa kagubot ug kaguliyang didto nagkahulogan lang sa ilang kaisog sa pagsugal sa ilang kinabuhi aron mabuhi.

Sama sa panag-ingnan nga kun gusto kang di mahagbong sa atabay ang imong kabaw, ayaw kini ihikot sa duol sa baba sa atabay.

Ang Libya gikahadlokan karong panahona gumikan sa walay katinuan kun kanus-a mahibalik ang normal nga kahimtang sa kalinaw sa maong lugar.

Mao man gani nga sa kabalaka sa atong kagamhanan, gusto nga salbaron niini ang mga OFW nga atua manarbaho sa maong nasud.

Kay sa tinuod, ang trabaho nga mawala, mahimo pang hikit-an kun may kinabuhi pa ang motrabaho, apan kun mamatay, aw impas ang tanan.

Apan nganong daghang mga OFW nga gustong magpabilin sa Libya luyo sa ka-peligro sa ilang kinabuhi didto?

Sa pagkatinuod, sila ra ang labing nasayud niini, apan sa mga tigpaniid, daghang nagtuo nga ang maong mga trabahante natuphan na sa hilabihang kasakit ug kahapdos sa ilang mga kasinatian dinhi sa nasud.

Kun hisgotan ang kapakyasan, malagmit gumikan sa gugma, suliran sa pamilya, o kaha ang kalisud sa panarbaho dinhi.

Malagmit nasud-ong nila nga kun anhi ra sila sa nasud manarbaho, kutob ra "hand to mouth" ang kinitaan ug halos wa ka nay ika-budget alang sa hospitalization, mga leisure o lingaw-lingaw sa kinabuhi, ug labaw sa tanan, wala kay ikagahin alang sa ikapatukod og maanindot nga balay, ikapalit og sakyanan ug ubang pahiyas ning kinabuhia nga makalipay sa usa ka tawo.

Kining mga pangandoya anaa sa tanan, apan tinuod kana nga kun ang saligang suweldo sa mga trabahante dinhi mao ra ang minimum nga suhol, kakha tuka gyud ang mabuhi dinhi, busa bahala na og peligro, pabor ang kadaghanan nga magpabilin didto sa Libya kay sa mopauli dinhi nga hilabihang paita. Di ba?