Sugyot lang

Nindot ang kamandoan ni Mayor Michael Rama ngadto sa mga sakop sa Cebu City Market Authority nga apilon pagpakabana ang kahimtang sa mga gagmay’ng merkado dinhi sa dakbayan.

Kining maong mga merkado nga matud ni Rama angay’ng tagdon sa mga sakop sa Market Authority naglakip sa mga gagmay’ng taboan sama diha sa eskena V. Rama avenue ug M. Velez nga naila nga “Eskena Banawa.”

Ang uban mao ang tyanggihan diha sa dalan Tabada, Mambaling, sa barangay Punta Princesa, unya kanang anaa sa likud sa Aderan Hotel sa Lahug, ug sa barangay Luz.

Kining maong mga dapit palibut sa maong mga tyanggihan pwerteng samoka tungod kay lakip ang aseras nga agianan unta sa mga tawo giukopar sa mga tindera.

Bitaw, ang gihatagan gud og pagtagad sa Market Authority mao ra man ang mga merkado nga dagku. Kanang merkado luyo sa Aderan Hotel anaa kana daplin sa karsada.

Lisud kaayo agian diha kay gawas nga gitindahan ang daplin sa aseras, ang entrada sa karsada gigamit nga terminal sa mga habal-habal.

Ang maayo tingali nga buhaton sa dakbayan mao ang pag-awhag ni Gobernador Gwen Garcia nga kanang bakante nga luna sa dayon nang tungas paingon sa Marco Polo, dapit sa tuo, maoy himoong merkado.

Pagka karon ang maong luna gihimo ra kana nga “shop sa mga scrap” ug ambot kinsa ang nabulahan diha. Dili ba nindot nga kining dapita kay daku man maoy himoong market?

Kun mahimo kini ni Mayor Mike Rama mobalik ang kahapsay sa karsada nga karon gihimo lang merkado ug pwerteng samoka.

Kini maoy rason nga ang Aderan Hotel wala g’yud mo-click. Kinsa man go’y gusto mopuyo diha nga baho man kaayo kay tupad sa merkado.

Ang maong karsada maoy agianan kun mopaingon ka sa sitio Laguerta sa Lahug. Ang mga sakyanan nga moagi diha magkingking g’yud tawon kay basin og makasabod sa mamalit.

Ang dapit nga akong gisugyot nga balhinan sa merkado maoy gisugyot nga himoong terminal sa mga habal-habal. Apan gihapon dili kini magsilbi.

Paputol ko’s liog og ang mga drayber sa habal-habal dili na ba magsaoy-saoy pagpadagan-dagan diha sa eskena sa JY Square kun may terminal na sila.

Mas maayo pa nga ang maong luna gamiton nga merkado kay mahawan pa ang karsada luyo sa Aderan Hotel.

* * *

Uy, nalipay diay ko nga gitagad na sa administrasyon ni Rama ang mga lubak-lubak kon libaong sa lainlaing mga karsada dinhi sa dakbayan.

Daghan ko og mga karsada nga naagian nga pwerteng libaongon kaayo kaniadto, apan karon gipangtapakan na sama diha sa dalan Sanciangko.

Ingon niana ang tukma nga buhaton sa atong nagdumala sa kagamhanan. Bisan og wala pa ta’y asphalt storm apan tapak-tapak lang usa maayo na lang kay sa pasagdan ang mga libaong.

* * *

Pagka nindot sa pamahayag ni Malo Manonggiring, ang regional director sa National Commission on Filipino-Muslims dinhi sa reheyon.

Giawhag niya ang mga Muslim nga motuman g’yud sa balaud, ilabi na ang pagtuman sa mga lagda sa Transportation and Traffic Code.

Gihatagan mi niya og “go signal” sa Land Transportation Office nga dakpon g’yud kun dunay ilang mga kadugo nga Muslim nga magpabadlong kay dili siya molaban.

Mao na’y lider. Kaayo unta og ingon niini ang baruganan sa mga lider sa National Commission for Indigenous People (NCIP) nga ania sa Sugbo.

Unya, duna say tawo nga hilig kaayo magpurong-purong sa iyang buhok, tambag namo ayaw na lang pag-drive og motor Bay para dili ka madakpan kay dili ka ra ba mag-helmet.