Wala kamo mahadlok?

Misalmot na si kanhi mayor ug karon Kongresista Tomas Osmeña kabahin sa isyu pagpangguba sa kabalayan sa mga “squatters” nga anaa giugbok sa kasapaan dinhi sa dakbayan sa Sugbo.

Andam mogahin si Osmeña og hinabang-salapi ngadto sa mga apektado sa demolisyon bisan og ang maong mga lumulopyo anaa magpuyo sa north district nga gawas na sa teritoryo ni Osmeña.

Sa iyang text message kanako, si Osmeña mipasabut nga gihatagan niya og dakung katungod sila si Konsehal Alvin Dizon ug Nida Cabrera pagdeterminar kun unsay mahimong tabang sa mga biktima sa demolisyon. Ang hukom ni Osmeña nga motabang nagumikan kay si Mayor Michael Rama wala kaayo mopasalig nga ang dakbayan sa Sugbo makahatag og tabang sa tanan nga mga tag-iya sa kabalayan nga maguba sa demolition team.

Pait g’yud tinuod ang kahimtang sa mga tawo kun ang ilang kabalayan maapektahan sa demolisyon.

Apan walay mahimo ang mga opisyal sa dakbayan kay gitumong kini aron dili mabutang sa kakuyaw ang kinabuhi sa maong mga squatters diha sa sapa. Wala motoo si Konsehal Dizon nga ang paghatag og financial assistance sa mga tag-iya sa kabalayan nga panggub-on makapadasig sa uban nga mopuyo diha sa mga danger zones.

Husto ang awhag ni Dizon nga kinahanglan nga kun limpyo na ang kasapaan, bantayan na g’yud nga wala nay mopuyo diha. Ang mga opisyal sa kabarangayan angay’ng motabang sa pagbantay.

Apan baya ning ubang mga konsehal uy, dili man lang magtagad kay mahadlok nga masuko kanila ang mga lumulopyo sa ilang dapit ug dili na unya sila botohan sa sunod eleksyon.

Wala g’yud masayop si Konsehal Dizon sa iyang awhag ngadto ni Mayor Rama nga angay’ng dunay imbintaryo nga himoon aron mahibaw-an ang mga yuta nga iya sa dakbayan nga himoan og socialized housing sa mga kabus.

* * *

Ang Ombudsman-Visayas nakakaplag g’yud og basihanan nga si San Roque (Ciudad) barangay captain Roger Ruizo ug kaubang mga konsehal sa barangay pasakaan og kaso.

Kining kaso nga atubangon ni Ruizo ug kaubang mga konsehal nagumikan kini sa paggasto nila og kwarta niadtong 2009 alang kuno sa mga tawo nga dunay apan sa ilang panglawas.

Apan ang mireklamo nga si kanhi Konsehal Lidiore “Boy” Miranda malampusong mipasabut sa Ombudsman nga kadudahan kaayo kay daghang mga tawo nga giapil sa lista ang miingon nga wala sila makatambong sa kalihukan nga gigastohan.

Tiaw mo nga apil sa nalista nga nakatambong kuno sa kalihukan alang sa mga Persons with Disabilities (PWD) mao si kanhi barangay kapitan Telesforo “Nanie” Rabaya nga namatay na man unta kini niadto pang 1994.

Pagkatoytoy g’yud! Nagduda ang mga imbistigador sa Ombudsman nga posible nga buhat-buhat ra ang report nga may kalihukan ang barangay unya nanguha sila og karaan nga lista, nga buhi pa si Rabaya, nga maoy gisuporta aron pag-justify sa gasto. Tukma ba? Aw, ang makahatag og tubag niini mao ang Gender and Development (GAD) focal person nga si Ligaya Britania nga maoy nag-andam sa maong dukomento.

Wala iapil si Britania sa kaso kay sila man si Ruizo ang nagpirma. Pagka-alegre g’yud niining maong kaso kun moabut na sa hukmanan. Tan-aw nako mas alegre pa tingali sa pista’s Carcar. He! He! He!

Duna man go’y ubang konsehal sa San Roque nga miingon nga nagpataka lang kuno ko’g suwat sa balita kaniadto. He! He! Nagpataka ra usab diay ang Ombudsman pagpakanaug og hukom?