Honorable Chairman

(Handog kay Hon. Col. Honorato Serrano

Bgy. Chairman, KC Grand Knight,

Sampaguita, San Pedro, Laguna)

Ngayon lang nangyaring sa isang barangay

bagong Chairman ay biglang pumanaw;

Marahil may iba pa siyang gagampanan

importanteng misyon mula sa Maykapal!

Di pa nagtatagal sa kanyang tungkulin

biglang-bigla siyang umalis sa amin;

Niloob ng Diyos na siya ay kunin –

sapagka’t sa langit gagawing bituin!

Itong aming Chairman ay mabuting tao

unang pangalan n’ya di ba’t Honorato?

Siya ay marangal tapat na sundalo

retirong Colonel – Sandatahang Hukbo!

Simpleng tao Siyang aming nakilala

di Siya magarbong katulad ng iba;

Una’y nagkagawad at ngayo’y Chairman na

subali’t ang palad may guhit na pala!

Bago naging Chairman – opisyal na tapat

sa aming Homeowners, sa KC ay Grand Knight;

Sa mga tungkulin di Siya umatras –

kaya ang gawai’y sa Kanya natambak!

At sa pulitika nang Siya’y lumahok

sa hangad na pwesto’y aming iniluklok;

Buo ang pag-asang Siya ang sasagot –

sa maraming kulang ng unang naluklok!

Ang barangay namin ay biglang sumaya

nang ang pagka-Chairman ay kanyang nakuha;

Napunta sa Kanya ang aming pag-asang

ang buong barangay ay mapagaganda!

Subali’t si Atoy kinuha ng Diyos

sapagka’t sa langit Siya’y maglilingkod ;

Si Lilia, si Boboy, kami’y malulungkot –

ang luha sa mata’y hindi mauubos

At ngayong wala na ang aming Bayani

sana’y mahusay din kanyang kahalili;

Masipag na Chairman – yumaong kay buti

magampanan niyang higit pa sa rati!