Si Jesus ug Santa Claus

Misugod na pagbiyahi si Santa Claus alang sa iyang gimbuhaton - ang pagpanghatag og pinaskohan ngadto sa mga angayang hatagan og pinaskohan. Sa wa pa siya mobiyahi iya usang gikumusta ang katawhan sa kalibotan gamit ang nagkalain-laing pinulongan. Manghinaut lang ko nga sa iyang pagbiyahi makaabot siya dinhi sa Pilipinas ilabi na sa dakbayan sa Sugbo aron makadawat upod kita sa iyang mga pinaskohan. Kun ugaling makahuna-huna si Santa Claus pagbisita nato dinhi sa Sugbo ako lang siyang pahibaw-on daan sa dili pag agi sa Mambaling ug Banilad kay basin malangay siya kay porbidang trapika.

Sa wa pa makasinati og kalisod ang ekonomiya sa nasud daghan kaayong Santa Claus maong daghan usab ang makadawat og pinaskohan pero karon gamay na lang kay ang ubang nag Santa Claus nanago. Tungod sa kanunay nga pagpanghatag ni Santa Claus og pinaskohan siya na ang kanunay nga atangan sa mga bata matag abot sa Pasko kay ilang gipaabot ang pinaskohan.

Usa ka higayon niana nagkaestorya kuno si Jesus ug Santa Claus. Gipangutana ni Santa Claus unsay hinungdan nga nagmagul-anon man ang nawong ni Jesus nga unta iya mang adlaw’ng natawhan. Si Jesus mitubag, maayo man ka Santa Claus kay matag bulan sa Disyembre daghan na kaayong magpaabot sa imong pag abot, ako nga mag-birthday gamay lang gyod kanila ang nagpaabot sa akong pag abot.

* * *

Si Ombudsman Merceditas Gutierez nag Santa Claus ngadto kang Major General Carlos Garcia kadtong comptroler sa AFP nga gipasakaan og plunder tungod sa dagkong kantidad nga gipangtagoan niini didto sa gawas sa nasud. Tungod kay misugot sa plea bargaining sa heneral nga angkonon ang salaud nga gipasaka kaniya pero dili sa kasong plunder kun dili sa ubos nga kasong direct bribery lamang resulta, gawasnon na ang heneral.

* * *

Maayong Pasko kaninyong tanan akong mga tigpaminawan sa Morning na Cebu ug Saksi Evening Edition sa DySS Super Radyo Cebu ug maayong Pasko usab sa tanan nga mga tagasunod ning akong lindog dinhi sa Banat News. Manghinaut lang ko nga sa inyong pagsaulog sa Pasko ug Bag-ong tuig kompleto pa ang parte sa inyong lawas.