Ablihan ang MCIAA

Hinaot nga pamatud-an dayon sa bag-ong general manager sa Mactan Cebu International Airport Authority (MCIAA), Engr. Nigel Paul Villarete, ang iyang pasalig pagpahibawo sa mga transaksiyon sa tugpahanan ngadto sa publiko pinaagi sa pagbukas sa labing una niyang tigom sa board of directors ngadto sa publiko. Masaligon ko nga di mosupak ang bag-ong mga sakop sa board. Gawas kun wa silay kalainan sa karaang mga sakop sa board nga gipasanginlan nga daghang tinagoan.

 Nakaseguro sab ko nga di mosupak si Gobernador Gwen Garcia. Kansang reklamo batok sa pipila ka sakop sa media mao nga wa sila mo-cover sa iyang pagduaw sa kalungsoran. Gawas kun siya mismo dunay mga tinagoan.

* * *

 Ang pagtak-op sa mga tigom sa MCIAA board gikan sa publiko, bisan sa mga sakop sa media, maoy gitumbok nga hinungdan nganong nakalusot ang gikuwestiyon na karon nga multi-milyones pesos nga mga transaksiyon.

Kun wa pa unta palawaya lang sa ilang mga tigom, di unta magmata lang og buntag ang Sugbuanong mga magbubuhis sa pagdalidali sa administration building, nga gikatahong gitukod sa luna nga wa panag-iyaha sa MCIAA, sa gipatakaan lang nga pagtukod sa MIP (Most Important Person) building ug sa pag-hire way kapuslanang consultants. Salamat sa tinak-opang mga tigom, nalangay sa board ang kausaban sa liderato bisan nawagtang na si kanhi presidente Arroyo.

* * *

Bisan nakatudlo na si Presidente Noynoy Aquino og bag-ong mga sakop sa MCIAA board, wa kaduma sa mga tigom ang iyang tinudlo nga si Transportation Undersecretary Aristotle Batuhan'. Naabtan og dul-an sa upat ka buwan una napahimutang si Villarete, ang iyang gipaluyohan nga bag-ong general manager.

Kasaligang mga tinubdan nibutyag nga silang Garcia ug outgoing general manager Danilo Francia ang nagtinabangay pagbaraw nilang Batuhan ug Villarete. Kay namugos man si Francia pagduma sa mga tigom, nilampos sila pagpugong sa bisan unsang botasyon. Aron di kabuylo ang bag-ong mayoriya. Hangtod nga gitapos ni Transportation Secretary Jose de Jesus ang ilang salida.

* * *

Kun mapatuman ni Villarete sa MCIAA, ang publikong mga tigom angay sang imando sa tanang korporasyon sa kagamhanan. Sa ingon, di na mangahas pagpaburot sa makalilisang nang daan nilang mga suholan ug mga benepisyo ang bag-ong mga tagduma sa GSIS (Government Service Insurance System), SSS (Social Security System) ug ubang GOCCs (government owned and controlled corporations).

Nga maayong balita alang sa ligdong ug buotang mga kawani sa MCIAA ug ubang GOCCs. Makaangkon na gyod sila sa hingpit nga mga benepisyo sukli sa ilang kakugi ug mga paningkamot. Kay ang mga sakop sa board di na makigribal nila. Pinaagi sa way pabor-pabor nga paghatag sa ilang kaugalingon og mas dagkong grado. Aron pagtino nga mas dagko ang ilang masipong nga bonus.

* * *

Email:[email protected]