Dili maayo nga plano

Mora’g dili pa g’yud maayo nga mopalit og 100 ka hektareya nga kayutaan ang dakbayan sa Sugbo diha sa barangay Toong aron lang papuy-an sa mga urban poor.

Bisan pa’g moingon si Konsehal Alvin Dizon nga karon duna pa’y kapin sa 20,000 ka pamilya dinhi sa dakbayan sa Sugbo nga walay klaro nga pinuy-anan, dili gihapon rason nga mamalit ta og dugang yuta.

Abi ninyo og ngano? Ang dakbayan sa Sugbo daghan pa kaayo og kayutaan nga napalit atul sa administrasyon ni kanhi mayor Alvin Garcia nga wala pa magamit.

Gipalit kadto sa kagamhanan sa dakbayan kay aron mapuy-an sa mga urban poor, apan resulta gigamit ra kini sa mga tawo nga ambut diin gikan.

Ang annual audit report sa Commission on Audit (COA) pipila ka tuig na ang milabay miawhag g’yud sa mga opisyal sa dakbayan nga mohunong usa og pagpamalit og kayutaan.

Basin og wala masayud si Konsehal Dizon nga ang syudad sa Sugbo dunay daghang kayutaan nga wala pa mapahimusli.

Katapusan nako nga nahibaw-an nga nakapalit man gani ang dakbayan atul sa administrasyon ni Garcia og P11 milyones nga kantidad sa kayutaan didto sa barangay Cambinocot.

Apan mao lagi, sa tanto nilang pagdinali-dali pagpalit, ang napalit nila kabahin diay sa Watershed Project nga gimando sa Malacañang nga dili mabaligya.

Tambag nako ni Konsehal Dizon nga mas labing maayo tingali nga ang ipalit sa kagamhanan og dugang yuta, ila na lang gastohon pag-develop sa maong kayutaan nga wala pa magamit.

Bisan si Konsehal Margot Osmeña mipadayag og kabalaka nga basin og ang mga tawo layoan na nga mopuyo didto kay sayonan ka Toong?

Layo kaayo ang maong barangay kay anaa kini mahimutang sa bukid nga bahin unahan pa sa barangay Pardo.

Usa ka higala nako nga department head sa City Hall mihung-hong nga nagduda sila nga basin sa pagpalit niining maong lapad nga kayutaan dunay maka-komisyon.

* * *

Ang maayong buhaton ni Mayor Michael Rama mao nga paimbistigahan niya ang mga dili maayong report nga iyang nadawat kabahin sa pagdumala sa Cebu City Medical Center.

Dugay na man diay’ng nakadungog ang mayor niining maong mga report nganong wala man nimo kini pahimoi og imbistigasyon mayor Mike?

Lahi man ang pormal nga imbistigasyon nga himoon lang kun dunay complaint. Apan isip mayor si Mike makahimo sa pagsugo sa iyang mga sinaligan sa paghimo’g discreet investigation. Unya ang OIC sa CCMC nga si Dr. Myrna Go dugay na kaayong gipangayoan sa konseho og kwentada giunsa paggasto sa CCMC kadtong girelease nga P5 milyon nga budget para dengue sa miaging tuig, wala pa g’yud makahatag.

Nahukman nga si Dr. Go ipatawag na usab sa Konseho ug paatubangon siya karong sunod Biyernes kay pangutan-on sa gipangayo nga liquidation.

Paita sab aning Dr. Go uy, pangayoan og report dili makahatag dayon. Kun pakighinabian usab sa media, mobalibad ug kun mapugos nga magpa-interview kuwang sa “unod” ang isulti.

Wala pa g’yud ko makalimot niadtong higayon nga buot nako siya nga ma-interview, apan gitulod-tulod ko niya nga ang konsehal lang nga chairman sa committee on hospital services ang akong pakighinabian.

Kay gitulod man usab ko’g balik sa konsehal ngadto niya, gibiyaan lang ko niining Myrna Go nga daw nakaminus.

Mao nga gikan niadto, dili na lang ko mosuway og interview niya. Sayud man ko nga bisan si Mayor Mike Rama wala makagusto ni Myrna.

Ang problema lang kay walay modawat sa maong pwesto.