EDITORYAL - Ang abilidad ni P.Noy

Ang abilidad ni Presidente Benigno Aquino III sa pagpakanaog sa tukmang desisyon ngadto sa mga tawo nga nakamugna og dakong kahasol sa milabay’ng administrasyon ug sa iyang panahon karon , nagpakita sa iyang talagsaong katakus ug hiyas nga wala dahoma sa kadaghanan.

Ang pagpahamtang niya og silot batok sa mga opisyal sa lokal nga kagamhanan ug sa kapolisan kinsa nagdanghag sa ilang katungdanan nga misangpot sa kamatayon sa walo ka mga langyaw’ng turista niadtong Agusto 23, ug ang paghatag og pasaylo sa mga rebelding sundawo kinsa napriso sa administrayon pa ni kanhi Presidente Gloria Macapagal Arroyo pulos gisandig sa inutok nga paghukom.

Dinhi masud-ong nato nga ang Pamuno nasud may igong baroganan sa pagpakanaog sa hustisyang desisyon nga gibase sa mga sayantipikanhong pamaagi ug dili kay mugna lang sa mga pinolitikanhong hunahuna.

Usa sa sayantipikanhong gihimo sa Pamuno nasud mao ang pagtukod niya sa incident investigation and review committee (IIRC) nga maoy mikulitog sa kinauyokan sa krisis sa pagpang-hostage didto sa Manila niadtong Agusto 23.

Sama ra usab sa iyang hukom sa paghatag og pasaylo sa mga sundawo nga nalambigit sa Oakwood mutiny, diin una siya mobungat sa iyang desisyon iya usab nga gipa-estudyohan pag-ayo sa iyang mga piniyalang opisyal kun angayan ba o dili pasayloon ang maong mga sundawo.

Apan alang sa kadaghanan, angay’ng daygon ang Presidente sa hustisyang iyang gipakanaog ilabi na ngadto sa mga pamilya sa mga turistang taga Hong Kong ug ingon man sa mga sundawong iyang gipasaylo.