EDITORYAL - Bisan way OIC ok ra

Gumikan sa dakong pagsalig nga walay kagubot nga mahitabo sa nasud, kompiyansa si Presidente Benigno Aquino III sa iyang pagbiya nga walay gibiling OIC.

Kini human maaninaw sa Pamuno nasud nga walay mga timailhang may hulga sa kalinaw ug kahusay base sa mga pasalig sa nagkalainlain niyang piniyalan gikan sa military ug kapolisan ug labaw sa tanan sa mga grupo sa intelligence sa duha ka puwersa.

Ang tanang pagsalig sa Pamuno nasud labing milig-on gumikan sa mga modernong kahimanan sa komunikasyon karon nga bisan tua siya sa Estados Unidos sa America kay mitambong sa mahinungdanong panagtagbo sa United Nations, makita niya ug madungog sa labing kasayon ang unsa mang panghitabo sa palibot sa nasud.

Sama ra si Presidente Aquino sa usa ka bana, kinsa dako kaayo og pagsalig sa iyang asawa ug mga anak kay gumikan sa kapiyalan ug kasaligang mga hiyas niini, malinawon siya ug dili mabalaka sa higayong mobiya siya makadiyot aron atubangon ang mga gimbuhaton nga may labot sa iyang trabaho o kaha pamatigayon.

Busa dili usa ka isyu batok sa presidente ang katahap sa kadagahanan nga wala siya mosalig kang Bise Presidente Jejomar Binay kinsa gituohan sa kadaghanan nga mao untay ikaduhang dakong opisyal sa nasud nga piyalan isip OIC kun wala ang Pamuno nasud.

Apan halapad kaayo ang panabot ni VP Binay, kinsa malipayong miangkon nga ang kahapsay sa ilang pagdumala sa nasud, nakapaluag sa pagsalig sa katawhang Pilipino nga anaa man o wala ang Presidente, magpabiling kapiyalan ang tanang mga opisyal nga gitugyanan niini sa pagpadagan sa nagkalainlaing ahensya sa kagamhanan nga maoy nagmintenar sa katibuk-ang kamalinawon sa Pilipinas.