Ang Korte Suprema ug ang Truth Commission

Sa atong pagsulat niini, sila si Senador Joker Arroyo ug Representante Edcel Lagman, diha pa sa planning stage nga ilang isaka ngadto sa Korte Suprema ang kaso bahin sa legality sa Philippine Truth Commission.

Maoy ilang gibarugan nga kuno, walay gahom ang Executive Department pagtukod sa maong commission, kondili, anaa kini sa Kongreso. Sa ato pa, unconstitutional kuno.

Apan, daku ang pagsalig sa Malacañang sa kaligdong sa Supreme Court. Nga mohukom kini “based on merits and not on loyalty to as former appointing power.”

Matud ni Edwin Lacierda, spokesman ni Presidente Noy: “We have to trust the institution of the Supreme Court. The justices are the final arbiter, and I am sure that they will be ruling on the case based on the merits of Executive Order No. 1, and not because they were appointed by former President Arroyo.”

Mao ni ang gisaligan ni Noynoy: Ang kaligdong sa mga justices sa Korte Suprema, nga ang ilang desisyon, dili ibasi sa ilang pagka-tinudlo ni Kongresista Arroyo, kundili, sa merito niini.

Sa panahon ni Kongresista Arroyo, sa iyang pagka-Presidente, duha ka komisyon ang iyang gitukod: Ang Melo Commission nga nag-imbestigar sa pagpamatay ug pagkawala sa mga journalists ug mga lider sa mga walhon. Nganong wala man moreklamo sila si Joker ug Edcel niini?

Unya, sa bag-o pa si Gloria sa gahom gitukod ang Feliciano Commission, nga mitan-aw sa mga hinungdan sa military unrest niadtong panahona. Diin man sila si Joker ug Edcel niining panahona? Nganong legal man ang pagkatukod sa maong mga komisyon, apan karon, illegal na? Unconstitutional na?

Sa isyo nga kuno ang Davide Commission mo-duplicate sa katungdanan sa Ombudsman, si Lacierda namahayag nga dili kini mahitabo. Kini tungod kay ang Truth Commission, dili usa ka prosecuting body.

Sa ato pa, ang Truth Commission, dili mo-imbestigar sa usa ka postmaster nga ikihag malversation of public funds, o sa police nga isumbong nga nangutong. Ingon man, walay labut ang Truth Commission sa mga kaso batok sa usa ka gidudahang customs official nga nangurakot, o sa usa ka magtutudlo nga gikiha gumikan sa pagmolestiya sa usa ka estudyante.

Katungdanan kini sa Ombudsman, ug dili moilog ang Truth Commission niining maong kaakohan gikan sa Ombudsman, sumala sa gikahadlokan ni Lagman. Sama sa Melo ug Felicano Commission, specific kaayo ang katuyoan sa Truth Commission, ug sama sa mga Truth Commission nga gitukod sa ubang kanasuran.

Ang Truth Commission, wala mag-abolish sa Department of Justice, sa Ombudsman, o sa Solicitor General. Ug wala kini mo-duplicate sa mga kaakohan sa maong mga ahensiya sa kagamhanan.

“We believe that the power to create the truth commission was given to the executive branch under the Administrative Code of 1987,” sumpay ni Lacierda.

Mangutana tag usab: Hadlok ba sila sa Truth Commission? Ngano man?