Trahedya sa kadalanan

CEBU, Philippines - Nakurat ang tanan sa makalilisang nga balita mahitungod sa dakong trahedya sa Transcentral Highway didto sa lungsod sa Balamban sa niaging semana. Wala kita magdahom nga ang biyahe alang sa usa ka outing sa pipila ka Iranian national mosangpot sa dugoon nga hitabo.

Sa ato nang nasayran, usa ka tourist bus nga gisakyan sa pipila ka Iranian ang nahulog didto sa lawom nga bung-aw sa Barangay Cansumoroy, Balamban kaniadtong Hunyo 13.

Patay ang 20 ka Iranian, kinsa kadaghanan mga medical student sa nagkalain-laing tulonghaan sa dakbayan sa Sugbo, ug ang drayber sa bus kinsa usa sa tag-iya sa J&D Tours.

Gilupad na ngadto sa Iran ang mga patay’ng lawas sa mga biktima sa maong trahedya. Ug pipila usab sa mga biktima ang naa nalandig karon sa nagkalain-laing hospital sa dakbayan.

Luyo sa maong insidente, mitumaw ang nagkalain-laing reaksiyon sa mga Sugboanon. Adunay miingon nga usa sa mabasol sa maong trahedya mao mismo ang drayber nga namatay.

Hinuon dili usab kita makaingon nga nagdanghag ang drayber nga maoy hinungdan sa maong insidente. Usa siya sa mga tag-iya sa maong bus hinungdan nga makaingon usab kita nga grabe ang iyang pag-amping samtang iyang gisuhid ang Transcentral Highway niadtong tungora.

Wala gayuy suwerte siya ug ang iyang mga pasahero samtang nagsakay sila sa maong sakyanan nga may numerong 666 sa plaka niini. Kutob ra gayud ang ilang mga kinabuhi niadtong adlawa.

Apan mao lagi, sa mga insidente sa kadalanan kanunay gayud mabasol ang drayber. Kini gumikan usab sa rason nga daghan sa drayber ang nagdinanghag sa ilang pagmaneho.

Gani, adunay mga grabe’ng insidente sa kadalanan nga nagresulta gikan sa pagkawalay konsentrasyon sa mga drayber. Daghan kanila ang magduka gani atol sa ilang pagmaneho nga maoy hinungdan usahay sa pagkabangga nga mokalas sa ubay-ubay nga kinabuhi.    

Hinuon dili na nato ikatingala nga adunay mga drayber nga abusado usab sa ilang pagmaneho. Adunay pipila ang mosuyop pa og ginadili’ng druga aron kondisyon kuno ang ilang pagtadlas sa kadalanan.

Apan risko kaayo kini gumikan kay mawala ang ilang konsentrasyon sa pag-drive gumikan sa druga nga nagtuyok-tuyok sa ilang utok. Kini ang hinungdan ngano nga dako usab ang tsansa pagtumaw sa trahedya sa kadalanan.

Kadaghan na nahitabo nga druga ang hinungdan sa mga ngilngig nga insidente sa kadalanan. Ug angay lamang nga mahigmata na ang otoridad ug higpitan ang ilang kampanya batok niining maong klase sa mga drayber, ilabina niadtong nagmaneho sa mga pampublikong sakyanan.

Hinuon dili ko moingon nga dako og kalabotan ang druga sa trahedya didto sa Balamban. Kini gumikan kay wala koy ideya kun tiggamitan ba og druga ang maong drayber.

Ug kun ato gayong sabton, layo ra sa tinuod ang kalambigitan sa druga sa maong insidente. Nasayod kita nga ang maong drayber usa sa mga tag-iya sa maong bus ug dili siguro niya iamong ang iyang negosyo sa bisyo nga walay hinungdan nga posible niyang ikapordoy.

Apan daghan usab ang mibasol sa kagamhanan sa maong insidente. Matud sa pipila walay insaktomg pahimangno nga gibutang ang kagamhanan sa maong highway nga sarang makahatag og warning sa mga drayber alang sa igmat nga pagmaneho.

Apan dili karon ang panahon sa pagbinasolay kun si kinsa ang sad-an sa maong trahedya. Angay hinuon nga himoon sa mga hingtungdan ang pagtinabangay aron makab-ot sa mga biktima ang hustisya.

* * *

Email: [email protected]