EDITORYAL - Inutil nga LTO-7

Kasagaran sa mga disgrasya nga nanghitabo sa kadalanan gibasol sa mga drayber. Ang ilang ka-kaskasero maoy nag-unang ugat sa mga aksidente sa kadalanan nga mokalas og mga kinabuhi.

Apan ang wala masayri sa publiko mao ang kapolpol sa ahensiya sa kagamhanan nga gitahasan pag-monitor sa “road worthiness” sa mga sakyanan nga hatagan og Certificate of Registration (CR) sa Land Transportation Office (LTO-7).

Matag adunay disgrasya mao pay ilihok ug ipasikat sa mga opisyal sa LTO-7, pinanguluhan ni regional director Raul Aguilos. Kun wala pa matagak sa bung-aw sa Cansomoroy, Balamban ang tourist bus nga mikalas og 20 ka mga Iranian ug sa drayber niini, dili ipa-ilawom sa “road worthiness test” ang mga sakyanan sa JD Tours ug dili mahibaw-an nga dili diay angay padaganon.

Kun wala pa mabangga ngadto sa trak de karga ang mini-bus didto sa Naga niadtong Marso 2009 nga mikalas og daghan, ang LTO-7 nga gipanguluhan ni Aguilos, dili usab mohimo og roadside random drug test. Karon kay wala na may disgrasya, wala nay roadside random drug test nga gihimo ang buhatan ni Aguilos.

Ang nahitabo sa Cansomoroy nagpakita sa ka-inutil sa LTO-7 ubos sa pagdumala ni Aguilos. Sukad nga iyang napulihan si Atty. Alex Leyson, nawad-an na og direksiyon ang LTO-7.

Ubos sa pamunoan ni Aguilos, ang focus sa LTO-7 mao ang negosyo sama sa pagpakig-alayon sa mga pribadong indibidwal nga makabukas og pribadong drug testing clinic tupad sa mga license registration centers, medical clinic ug emission testing centers.

Ang operasyon sa Operations Division sa LTO-7 mitutok usab sa mga salaod sa mga motorista nga dili makahatag og kahasol sa publiko kun madisgrasya. Kini sama sa mga pribadong motorsiklo nga ilang pangdakpon kun wala mag-helmet, apan wala maka-operate sa mga lungsod kang kansang liboan ka mga habal-habal drayber wala mag-helmet.

Ang pribadong motorista nga dili mag-helmet mao ra ang mamatay kun madisgrasya, apan kun madisgrasya ang habal-habal, mahimong mamatay hasta ang mga pasaherong walay helmet.

Ang mga drayber sa pribadong kotse espesyalon og panakop sa LTO-7 kun wala mag-seatbelt, apan ang mga operatiba dili gani makapanakop sa mga dayber sa mini-bus nga hangtod karon hilabihan ka-kaskasero, mag-overloading ug mag-overspeeding.