EDITORYAL - Kagawasan sa Pilipinas

Adlaw kagahapon sa ika-112 nga kasaulogan sa kagawasan sa Pilipinas gikan sa mga kamot sa mga langyaw. Giselebrar kini sa atong gobiyerno ug angayang kitang tanang Pilipinhon isipong bililhon kini ug labaw sa tanan, ampingan kini hangtud sa kahangturan.

Kini lamang ang hinungdan nganong aduna kitay kaugalingong Bandila, Nasudnong Awit nga Lupang Hinirang, kaugalingong pinulongan ug uban pa.

Aduna kitay kaugalingong teritoryo nga matawag natong ato ug girespeto usab sa ubang nasud gumikan kay giila nila kitang usa ka gawasnong nasud ug may kaugalingong direksyon.

Apan bisan paman makadaghan na nato kining gisaulog matag tuig daghan pa gihapong mga tawong wala makombinsir nga kita gawasnon na gyud gikan sa mga langyaw.

Lakip sa ilang gihulagway nga pagpanghilabot sa atong kagawasan mao ang impluwensya sa ubang nasud dinhi sa atong panggobiyerno, ekonomiya ug uban pa.

Gipasanginlan ang mga langyaw nga maoy nagkupot sa kaugmaon sa mga Pilipino pinaagi sa pagbuot kung unsay atong polisiya sa sulod ug sa gawas sa atong teritoryo.

Ang atong mga polisiya giingong kanunay’ng paborable ngadto sa mga langyaw ug dili nganhi kanatong mga Pilipino.

Dunay mga puntong husto ang maong panglantaw ug pagduda, apan duna say dili. Ang kagawasan sa usa ka nasud wala magpasabot nga gawas na gyud sa impluwensya sa ubang nasud gumikan kay aduna man kitay mga kasabutang gisudlan sama sa mga economic policies.

Dili ba kaha ang nasinati nato karong ‘pagpanghilabot’ sa ubang nasud bunga lang sa kapakyas sa atong mga gipamiling lider o opisyal nga napakyas pagtuon og maayo sa mga polisiya ug kasabutang ilang gipangsudlan nga nagbutang kanato sa ubos?

Ang kagawasan sa Pilipinas nagdepende sa kung si kinsa ang atong lider, usa ba siya ka ‘puppet’ sa ubang nasud o ‘servant’ sa atong katawhan?