Adik nga mga drayber

Ang Land Transportation Office mipahigayon og kinalit nga random drug test sa mga drayber sa pampublikong sakyanan niadtong Biyernes. Ang kalihukan inabagan sa Task Force Alpha personal nga gipangulohan sa hepe sa LTO nga si Arturo Lumibao.

Atol sa random drug test lima sa 50 ka mga drayber nga gipaubos niini namatud-ang positibo sa paggamit og illegal nga drugas. Upat nila ang migamit og shabu samtang ang usa tiggamitan og marijuana. Ang LTO mililong sa mga pangalan sa maong mga drayber apan gibawi-an na sila sa ilang mga lisensiya.

Ang tigpamaba sa Task Force Alpha ang akong higala ug kauban nga si Rene Borromeo mipasabot nga ang mga drayber nga namatud-ang positibo sa paggamit og drugas giisyohan og temporary operator's permit nga magtugot nila nga makamaniho sulod sa tulo ka adlaw.

Human niini dili na sila makamaniho hangtud nga makuha nila ang ilang lisensiya.Wa hinuoy kasigurohan kun makuha ba nila kini pagbalik tungod kay kun makonpirmar sa himoong confirmatory test nga illegal nga drugas gyud ang gigamit sa maong mga drayber mamahimo na kining basihanan alang sa hingpit nga pagbawi sa ilang mga lisensiya.

Dugay nang gipaabot ang maong kalihukan nga sugdan sa LTO salamat nga sa katapusan gihimo na gyud sa maong ahensiya ang ilang tahas. Wala malilong ang daghang aksidente sa kadalanan nga maglambigit sa mga public utility vehicles.

Admitido ang LTO nga sagad sa mga aksidente sa kadalanan mugna sa mga “reckless drivers.” Basi sa ilang datus 48-porsiento kon hapit katunga sa gidaghanon sa mga aksidente sa kadalanan mugna sa mga daghang nga pagmaniho.

Matud ni Lumibao nga ang paggamit og gidiling drugas usa sa mga hinungdan nganong magdanghag ang mga drayber sa ilang pagmaniho tungod kay wala na man sila sa maayong paminsar. Dinhi lang sa Sugbo daghan ang mga kinabuhi nga nakalas dihang usa ka mini bus nga gipanag-iya sa EDC Liner ang mibangga og laing sakyanan didto sa Naga pipila ka buwan na ang milabay.

Ang mga adis-adis nga mga drayber sa mini bus maoy gitumbok nga hinungdan niini. Busa nalipay kaayo ko dihang nasayod nga gisugdan na sa LTO ang ilang “roadside random drug testing.”

Dili hinuon ko kontento sa silot nga mahimo sa LTO tungod kay igo man lang nilang bawi-an sa lisensiya ang mga namatud-ang positibo sa drugas. Mas labing maayo kun gawas sa pagbawi sa ilang lisensiya pasakaan pa gyud og kasong kriminal ang maong mga drayber. Ang pagpasaka og kasong kriminal siguro makahatag og dugang kahadlok sa mga drayber tungod kay sigurado man gyud nga sila mapriso kun sila masakpang mogamit og drugas.

* * *

Angayang susihon sa kadagkuan sa Bureau of Customs ang reklamo sa mga brokers ug importers batok sa usa ka opisyal diha sa Mactan nga mihimong gatasan sa pagpangnotaryo sa mga import entry nga i-process diha sa iyang buhatan.

Ang reklamo nga miabot kanako mao nga ang hepe sa Entry Processing Unit diha sa Customs Mactan nga si Jing Donaldo mamugos nga siya maoy monotaryo sa mga entry ug mangayo og P500. Dili pa dawaton ni Donaldo ang mga papelis kun kini ginotaryohan og laing abogado.

Sumala pa sa misumbong diri nako nga bisan og notaryado na ang iyang dokumento gipapas sa maong opisyal ang ngalan sa abogado nga ninotaryo og ang iyang pangalan maoy gihulip dayon pangayo og P500.

Samtang duna siguro siya'y katungod nga monotaryo bisan dili siya abogado basi sa gilatid sa Tariff and Customs Code of the Philippines, apan dili sab tingali makiangayon nga iyang pugson ang kliyente nga adto niya magpanotaryo.

Garapal ug klaro ning pangwarta nga dakong kalapasan sa atong balaud.

* * *

[email protected]