Langay nga kadaugan gusto sa mga tikasan

Ang Korte Suprema mipabor sa kasong gisang-at ni Tining Martinez batok kang kongresista Benhur Salimbangon nga nag- question sa pagdaug niini sa pagka kongresista sa ika-upat nga distrito sa lalawigan sa Sugbo. Apan ang maong hukom sa kadaugan migawas pila na lamang ka bulan ang nahabilin sa dili pa ang Mayo nga piniliay.

Mao usab ang nahitabo didto sa Bulacan, gideklarar usab didto nga si Obet Pagdanganan ang midaug sa pagka Gobernador ug dili ang naglingkod karon nga si Junjun Mendoza.

Ang kadaugan ni Martinez ug Pagdanganan wa pay seguro kun maangkon ba gayod nila sa hingpit tungod kay ang mga naghawid sa ilang position dili gusto nga mobuhi niini. Langayon pa nila ang kaso hangtod mahuman na lang upod ang umaabot nga piniliay. Maayo na lang gani'g makalingkod ni sila og usa ka adlaw sa posisyon nga ilang nadag-an pero gihikaw kanila ang pagpadagan.

Mao na gayod ni karon ang dagan sa mga election protest dinhi sa nasud, maresolbar lang kun pila na lang ka adlaw ang nahabilin sa termino. Ang resulta looy kaayo ang mga mananaug nga natikasan sa piniliay.

Ang kalangay sa pagresulbar sa mga election protest mao ang nakapaingganyo sa mga politikong tikasan sa pagpanikas sa piniliay tungod kay makapahimulos pa man sila pagmaayo bahala na lang kun sa katapusan sila ang ideklarar nga pildero. Busa dalion unta kini sa pagbutang og solusyon. Dili man ugod makiangayon ngadto sa tinooray nga pinili sa katawhan ang paghikaw kaniya sa pag-alagad kanila.

* * *

Happy birthday diay ni Ma. Nora nga nagsaulog sa iyang adlaw nga natawhan karong adlawa. Gikan kanako ug sa imong mga anak Jheremy, Jay, Honey Vive, Hannah ug Hennah.